Бұл жолы сот Грузияның бұрынғы президентін "бюджет қаражатын заңсыз жұмсады" деп таныған.

Ол қазірдің өзінде басқа қылмыстық істері бойынша жазасын өтеп жатыр, деп хабарлайды inbusiness.kz сайты.

Осылайша, Михаил Саакашвилидің бас бостандығы 9 жылға шектелді. Ол мемлекеттік қаражатты ірі көлемде талан-таражға салғаны үшін жазаланбақ. Бас бостандығынан айыру туралы шешімді судья Бадри Кочламазашвили шығарды.

Сонымен қатар, бұл істе Грузияның арнайы күзет қызметінің бұрынғы басшысы Теймураз Джанашия бар. Оған "қызметтік өкілеттігін асыра пайдаланды" деген айып тағылып, 300 мың лари (шамамен 110 мың доллар) көлемінде айыппұл салынған.

"Пиджактар ісі" – Михаил Саакашвилидің 2009-2013 жылдар аралығында мемлекеттік бюджеттен 8,8 миллион лари (шамамен 3 миллион доллар) жеке қажеттіліктеріне жұмсағаны туралы іс.

Тергеу мәліметінше, ол бұл қаражатты Лондонда қымбат киімдер, яғни, жеті пиджак пен кашемир пальто сатып алуға, демалысқа және косметикалық процедураларға жұмсаған.

Тағылған айыпты Саакашвили мен Джанашия мойындамайды әрі процесті "саяси астары бар" деп есептейді.

Еске салайық, Михаил Саакашвили осы уақытта да қылмыстық істер бойынша 6 жылдық жазасын өтеуде. Ол "Сандро Гиргвлианидің өлтірушілерін заңсыз кешірді" және "депутат Валери Гелашвилиді соққыға жығуға бұйрық берді" деген айыппен сотталған еді.