Сонымен қатар салалық AI-hub компаниясы мен ai-hub.kz сайты таныстырылды.

Қазақстанда "Жасанды интеллект әліппесі" кітабының тұсаукесері өтті. Іс-шара барысында TurkAI – түркі мемлекеттерінің жасанды интеллектшілер қауымдастығының құрылғаны хабарланды.

Алматыда өткен кітаптың таныстырылымына халықаралық сарапшылар ғалымдар, зиялы қауым, қоғам қайраткерлері, медиа, білім және технология саласының белгілі тұлғалары мен мамандары қатысты.

"Еңбек бағдарламалауды білмейтін, бірақ AI мүмкіндіктерін зерттеп, қолданғысы келетін адамдарға арналған. Жасанды интеллект саласындағы негізгі ұғымдарды қарапайым тілмен түсіндіреді. Қазірдің өзінде сұраныс өте жоғары болғандықтан, кітапты екінші басылымға жіберіп жатырмыз", – деді саланы зерттеп жүрген кітап авторы – жасанды интеллект және IT технология саласының сарапшысы, журналист Мейіржан Әуелханұлы.

Белгілі журналист, қаламгер, публицист әрі еңбектің редакторы Қайнар Олжай жасанды интеллект деген не деген сауалға толық жауап беретін кітаптың өте сауатты жазылғанын, қазақ оқырманына ауадай қажет екенін атап өтті.

Сонымен қатар белгілі медиа менеджер, Қазақстанның еңбек сіңіргер қайраткері Нұржан Жалауқызы, белгілі әдебиеттанушы ғалым Мамай Ақетов, әл-Фараби атындағы қазақ ұлттық университетінің журналистика факультеті деканы Қанат Әуесбай өзге де қатысушылар өз лебіздерін білдірді.

Кітап туралы белгілі педагог Өмірбек Шыныбекұлы да "Осы кітапты Оқу-ағарту министрлігінің сарапшылары қарап шығып, қосар-алар тұстары болса, автормен жұмыс істеп, мектептерге тарату керек. Жасанды интеллект дәуірінде оны дұрыс қолдану, промптарды дұрыс жазу әдісі маңызды деп ойлаймын", – деп салалық министрге ұсыныс жасаған болатын.

Кітап Орталық Азия елдерінде жасанды интелект саласына қатысты алғаш шыққандықтан Өзбекстан, Қырғызстан елдерінен аударуға ұсыныстар түскен.

Іс-шара аясында жаңа құрылған AI-HUB компаниясының мақсаты айтылды. Оның басшысы Ержанар Әшейханның сөзіне қарағанда, компания – жасанды интеллект, IT, кибер және ақпараттық қауіпсіздік, ақпараттық және цифрлық технологиялар, сонымен қатар биотехнологияларды зерттеу мен дамытуға бағытталған бірегей ұйымға айналуды көздейді. Негізгі мақсаты – озық технологияларды түрлі салаға енгізу, халықтың цифрлық және ақпараттық сауатын арттыру, сонымен біргесалалық стартаптарды қолдау.

Жасанды интеллектке қатысты алғаш рет оқулық басып шығарған Ai-Hub publishing баспасы болса, алдағы уақытта жаратылыстану, IT мен жасанды интеллект саласына қатысты әлемдегі танымал кітаптарды қазақша аудармақ.

Сонымен қатар сала ғалымдары, мамандарымен бірлесе отырып балаларға, оқушылар мен студенттерге арналған оқулықтар мен әдістемелер әзірлеуді көздеп отыр. Сонымен бірге жасанды интеллект терминдерін жасау мен энциклопедиясын қазірден бастап дайындауды қолға алмақ.