Болжам бойынша 7 миллионға жуық шетелдік қонақ келеді деп жоспарланған. Бұл туралы Ақ үйдің халықаралық сайыс дайындығына жауапты директоры Эндрю Джулиани баспасөз отырысында мәлімдеді. АҚШ, Канада, Мексика үшеуі қатар өткізетін біріншілік 11 маусым-19 шілде арасында болады. 48 ел 104 матч өткізеді.

Теңбіл доп додасы Солтүстік Америка құрлығының 16 қаласын қамтиды. Сондай-ақ оның 11-і — АҚШ аумағында. Америка тәуелсіздігінің 250 жылдығымен тұспа-тұс келген шара алдында шетелдік туристердің келіп-кетуі басты назарда болды. Әсіресе АҚШ-қа визамен келетін елдердегі консулдық қызметтердің жылдамдығы артып, айлап күтетін сұхбат уақыты қысқарған. Мысалы, бұрын Өзбекстан туристері АҚШ визасы үшін cұхбатқа бір ай кезекте тұрса, енді ол екі аптаға қысқарды. Ал Мессидің жерлестері аргентиналықтар үшін күту уақыты 1 жылдан 2 айға азайған.

Эндрю джулиани, Ақ үйдің FIFA-2026 жөніндегі жұмыс тобының атқарушы директоры:

- Біз 2026 жылғы әлем чемпионаты қарсаңында сұранысы жоғары елдерде АҚШ визасына жазылу мерзімін едәуір қысқарттық. Ақ үйдегі кездесуде Марко Рубио Аргентина мен Бразилиядағы жағдайды айрықша атап өтті. Қазір әлемнің 80%-дан астам елінде жанкүйерлер визалық сұхбатқа екі айдан аз уақыт ішінде жазыла алады. Мемлекеттік департамент бұл үрдісті жалғастыру үшін консулдықтарға 450-ден астам қосымша қызметкер жібереді. Қазірдің өзінде 300 мыңнан астам қосымша виза берілді, ал келесі жылдың басына қарай бұл көрсеткіш миллионға дейін өседі.

Алайда әлем чемпионатына Азиядан іріктелген Иран мен Солтүстік Америка аймағынан шыққан Гаити үшін жағдай қиын. Бұл елдердің жанкүйерлері тұрмақ, команда ойыншыларына да виза беру мәселесі қазір қыл үстінде тұр. Президент Трамптың қара тізіміне енген Гаити саяси тұрақсыздық, зорлық-зомбылық және гуманитарлық дағдарыс жағдайында қатаң тексеріске тап болып отыр.

Эндрю Джулиани, Ақ үйдің ҒIFA-2026 жөніндегі жұмыс тобының атқарушы директоры:

- Кез келген виза туралы шешім ең алдымен ұлттық қауіпсіздікке қатысты шешім болғандықтан, әр адам мұқият тексеріледі. Иран делегациясының бір бөлігіне виза берілді, ал бір бөлігіне берілген жоқ. Яғни әрбір шешім ұлттық қауіпсіздік өлшемдерімен қабылданады. Президенттің басты міндеті – АҚШ азаматтарының ғана емес, Әлем чемпионатына келетін барлық қонақтардың қауіпсіздігін сақтау. Сол себепті ондай қауіптің алдын алу үшін АҚШ-қа келмей тұрып-ақ ең қатаң тексеру жүргізіледі.