Денсаулық сақтау министрлігі Қазақстан Республикасында нефрологиялық көмек көрсетуді ұйымдастыру стандартына өзгерістер жобасын әзірледі, деп хабарлайды Zakon.kz.

Құжатта мына бағыттар бойынша түзетулер көзделген:

• бүйрек қызметін алмастыру еміне (БАЕ) мұқтаж пациенттерге медициналық көмек көрсету өлшемшарттары;
• созылмалы бүйрек ауруының (СБА) 4–5 сатысындағы пациенттерді БАЕ-ге жіберу тәртібі;
• гемодиализ жүргізу тәртібі;
• БАЕ алатын науқастардың жағдайын бақылау;
• күту тізімін қалыптастыру және оны жаңарту, донорды дайындау;
• жаңа ұғымдармен толықтыру.

Түсіндірілуінше, бүйрек аурулары бар пациенттердің медициналық көмек маршрутын бақылау бас нефрологтың үйлестіруін қамтиды. Онда СБА-ның 4–5 сатысындағы пациентке диализге қол жеткізу жолын қалыптастыру, диализге арналған қолжетімділіктің түрлері мен оларды қамтамасыз ету талаптары, сондай-ақ ем тактикасын амбулаториялық және стационарлық деңгейден бастап айқындау нақты көрсетілген.

Министрліктің мәліметінше, бұл өзгерістер нефрологиялық көмекті жетілдіруге бағытталған. Атап айтқанда, жобаны қабылдау:

• бүйрек аурулары бар науқастарға көрсетілетін нефрологиялық көмектің сапасын арттыруға;
• созылмалы бүйрек ауруы бар пациенттердің диализдік емін оңтайландыруға;
• өңірлік үйлестірушілердің бақылауында нефрологиялық көмекті жүйелі түрде қолдауға мүмкіндік береді.

Құжат "Ашық НҚА" порталында 22 желтоқсанға дейін көпшілік талқылауына ұсынылған.