Планшетке көшу мәселені толыққанды шешпейді.

Оқу-ағарту министрі Ғани Бейсембаев мектеп оқулықтары планшетке ауыстырыла ма деген сауалға жауап берді, деп хабарлайды inbusiness.kz сайты.

"Электронды оқулықтарды пайдалануда интернеттің жылдамдығының төмендігі кедергі болса, ол мәселені де біз 95 пайызға дейін шешіп отырмыз. Яғни, планшетке келетін болсақ, бүгінде біз бұл мәселені зерттеп, біздің сарапшылар бір пікірге келіп отыр. Планшет бұл мәселені толыққанды шешуде тиімсіз. Мұны әлемдік тәжірибеден көруге болады. Кезінде планшет ұстаған Батыс мемлекеттері одан бас тартып жатыр. Бір ауысымдық мектепке көшу, балалардың сабақ кестесін қайта қарау мәселесі сөмкенің ауыртпашылығына қатысты мәселені толыққанды шеше алатынын көріп отырмыз", — деді ведомство басшысы Мәжіліс кулуарында.

Журналистер спикерден "Яғни, планшеттер болмай ма?" деп нақтылады.

"Планшет болмайды. Оған көшу мәселені толыққанды шешпейді. Бұл үлкен қаржыны талап етеді", — деді министр.

Ғани Бейсембаев пандемия кезінде бастауыш сынып оқушыларына планшеттер уақытша берілгенін еске салды.

"Себебі көптеген отбасында планшет түгілі, компьютер де болмады. Сондықтан оқуға ыңғайлы жағдай жасау үшін бұл уақытша қабылданған шаралар болатын. Қазір мұндай қажеттілік жоқ. Бұл бағыттағы жұмыстар пысықталып жатыр", — деді Оқу-ағарту министрі.