Мұқтаждық деңгейі қайта қаралып, көмек көрсету жаңа жүйеге көшеді. Бұл жайында бүгін Премьер-министр Олжас Бектеновтің төрағалығымен өткен халықты әлеуметтік қолдау жүйесін жетілдіру мәселесі бойынша кеңесте айтылды, деп хабарлайды 24kz.

Жиында Еңбек және халықты әлеуметтік қорғау министрі Светлана Жақыпова цифрлық шешімдерге негізделген жаңа тәсілдермен таныстырды. Айтуынша, әлеуметтік көмектің әділетті бөлінуіне жол ашу үшін жаңа цифрлық тәсілдер енгізіледі. Ол қайталанатын төлемдерді болдырмайды. Сондай ақ төлемдердің түрлері мен мөлшері барлық облыстар мен қалаларда біріздендіріліп, өңірлік теңсіздік жойылады. Министрдің сөзінше, қазір 4 млн-нан астам азамат әлеуметтік көмек алады, бірақ нақты қиын жағдайдағылар саны 564 мың екен. Осыған байланысты көмекті нақты мұқтаждарға бағыттау қарастырылуда. Жиын соңында Үкімет басшысы халықтың әл-ауқатына жан-жақты талдау жасап, мұқтаждық деңгейін қайта бағалауды тапсырды.