Сенат төрағасы Мәулен Әшімбаев Рим Папасына Мемлекет басшысы жолдаған арнайы хатын табыстады. Ватиканға жұмыс сапарымен барған қазақстандық делегация Рим Папасы XIV Леоның қабылдауында болып, еліміздің конфессияаралық бастамалары мен Ватиканның рухани көшбасшылығына арналған халықаралық жиынға қатысты.

Онда Мәулен Әшімбаев Қасиетті Тақтың Дінаралық диалог жөніндегі ди-кастериясының префекті кардинал Джордж Кувакадпен және өзге дін істері ұйымдарының өкілдерімен екіжақты кездесу өткізді. Сенат Төрағасы Рим Папасы XIV Леоға Қазақстан Президенті Қасым-Жомарт Тоқаевтың жылы лебізін және елімізге Апостолдық сапармен келу жөніндегі шақыруын жеткізді. Сенат спикері еліміздің Ватиканмен ынтымақтастықты одан әрі нығайтуға мүдделі екенін атап өтті.

Мәулен Әшімбаев, ҚР Парламенті Сенатының төрағасы:
- Біз Ватиканның Әлемдік және дәстүрлі діндер көшбасшыларының съезіне көрсеткен тұрақты қолдауы үшін ерекше ілтипатымызды білдіреміз. Сіздің VIII Съезд қатысушыларына үндеуіңіз осы форумның Қорытынды декларациясымен бірге жаһандық диалогты нығайту және экстремизм мен төзбеушілікке қарсы іс-қимыл жолындағы рухани бағдар ретінде қызмет етеді. Өзіңізге қолайлы уақытта Апостолдық сапармен Қазақстанға келуіңіз біз үшін үлкен мәртебе болар еді. Мұндай сапар өңіріміздегі әралуан қоғамның өкілдерін жігерлендіріп, әділетті әрі үйлесімді халықаралық тәртіпті көздейтін ортақ ұмтылысымызға тың серпін береді деп сенемін.