"ЦОН" мобильді қосымшасында электронды сенімхат рәсімдеу бойынша жаңа сервис іске қосылды, деп хабарлайды "Азаматтарға арналған үкіметке" сілтеме жасаған KAZ.NUR.KZ.

Мемлекеттік корпорацияның мәліметінше, жаңа сервис азаматтарға мамандандырылған ХҚКО-ларда мемлекеттік қызмет алу үшін электронды сенімхаттарды онлайн форматта рәсімдеуге мүмкіндік береді.

Атап айтқанда, дайын құжаттарды алу, көлік құралдарын тіркеу және есептен шығару, көлік құралының техникалық паспорты мен мемлекеттік тіркеу нөмірлік белгісін ауыстыру немесе олардың телнұсқасын алу қызметтері.

"Қызмет көрсету үдерісі толықтай онлайн жүзеге асырылады және бар болғаны бірнеше минутты алады. Сенімхат электрондық цифрлық қолтаңба арқылы куәландырылады, бұл құжаттың заңды күшін қамтамасыз етіп, дербес деректердің қауіпсіздігін сақтауды қамтамасыз етеді.

Электронды сенімхатты қолдану үшінші тұлғаларға құжаттарды беру қажеттілігін жояды және заңсыз әрекеттердің алдын алуға ықпал етеді", — делінген хабарламада.

Сервисті пайдалану үшін "ЦОН" мобильді қосымшасында ЖСН және телефон нөмірі арқылы авторизациядан өту қажет.

Мәтіннен қате тапсаңыз, бізге жазыңыз