Атырау облысы Қызылқоға ауданында биыл 41 шақырымнан астам бөгет нығайтылып, күрежолдың бойына 14 суағар құбыр салынды, деп хабарлайды 24kz.

Кейінгі екі жылда Ойыл өзені ерте тасып, осы маңайдағы ауылдарды әбігерге салған еді. Соның салдарынан өзен бойындағы 7 ауылдық округті аудан орталығымен байланыстыратын көпір бұзылып, қатынас қиындады. Қазір аймақта ықтимал тасқынның алдын алу бағытындағы жұмыстар қалай жүріп жатыр?

Қызылқоға ауданы тасқыннан қорғану жұмыстарына ерте кірісті. Күні бүгінге 9 ауылдық округті қоршай 41 шақырымнан астам бөгет соғылып, былтырғы бұзылған учаскелер қалпына келтірілді. Бүгінде негізгі жұмыс аяқталған. Қазір Жасқайрат және Миялы селолары маңайындағы 2,5 шақырымдық бөгетті биіктету жұмыстары жалғасуда.

Мақсат Төкенов, Жұмылдыру дайындығы және азаматтық қорғаныс бөлімінің бастығы:

- Бөгетті көтеру жұмыстары осы наурыз айында толық аяқталады. Ойыл өзені, Ноғайты, Сағыз өзендерінде су тасу қаупі жоғары өте. Аудан бойынша 24 эвакуациялау орын бар. Қажетті құрал-жабдықтар әзірленді, 606 мың дана қапшығымыз бар, 6 жүзу құралы, 8 палатка, сосын барлық округтерде мотопомпаларымыз, сосын арнайы техникаларамыз бар 50-дің үстінде.

Аудан елді мекендерін тасқын судан қорғау мақсатында биыл облыстық бюджеттен 796 млн теңге бөлінген. Қосымша аудандық резервтен 34 млн және керекті құралдар алуға 45 млн теңге қаражат қарастырылып отыр. Сондай-ақ Ойыл өзені бастау алатын көршілес Ақтөбе облысымен байланыс жолға қойылды.

Бақтыбек Төлегенов, Қызылқоға аудандық ТЖБ бастығы:

- Қазіргі уақытта Ойыл өзенінде судың келу деңгейі бойынша «Қазгидрометтің» филаилы бойынша нақты ақпараттар алмасып отырмыз. Қазір енді Миялы ауылының Ойыл өзені бойында гидробекеттер орнатылды. Күндегі ақпарат су деңгейі бойынша алынып отыр. Қазір енді су деңгейі бірқалыпты. Қазіргі уақытта қардың қалыңдығы 50 см-дей.

Наурыздың басында аймаққа қар айлық нормадан 2 есе артық түсті. Аудан орталығының өзінде оның қалыңдығы жарты метрге жуықтаған.

Сағат Нұржанов, Жасқайрат ауылының тұрғыны:

- Жалпы енді қардың қалыңдығы осындай жоғары жақтан келеді ғой. Қары бар, келе жатқан суы бар. Дайындалып жатыр ғой соған енді, дамбы соғып. Жалпы жақсы, былтыр су жақсы келді біздің үйге тақалды, өзім шет жағында тұрамын. Биыл енді одан да 2 есе келеді деп жатыр ғой.

Былтыр су шайып кеткен Индер – Қарабау – Миялы күрежолының бойынан 14 учаскеге су ағатын құбырлар салынып, 7 округті аудан орталығымен жалғайтын көпір жөнделді. Ұзындығы 70, ені 11 метрлік көпір темір бетоннан құйылған. «Қазгидромет» мамандарының болжамы бойынша Ноғайты, Ойыл өзендері наурыз айының аяғына таман арнасынан асуы мүмкін.

Авторлары: Арыстанбек Кенже, Айбек Байзақов, Жандос Рахметуллин