Жасөспірім қыздардың жүктілігі проблемасы – кешенді тәсілді талап ететін құқықтық және әлеуметтік өткір мәселе.

Бұл жайында бүгін Сенаттың Әлеуметтік-мәдени даму және ғылым комитетінің отырысында айтылды. Депутат Нұртөре Жүсіптің сөзінше, ерте ана болу жас қыздар мен олардың балаларының денсаулығына кері әсерін тигізеді. Білім алу мен толыққанды даму мүмкіндіктерін шектейді. Сондықтан да профилактикалық шараларды күшейтіп, жастардың хабардарлық деңгейін арттыру қажет. Сонымен қатар жасөспірімдерге, дәрігерлік және психологиялық қызметтердің қолжетімділігін жақсарту басым міндеттердің қатарына жататындығын айтты. Бұған қоса, жоғары палата өкілдері репродуктивті денсаулық бойынша білім беру бағдарламаларының сапасын арттыру керектігіне де назар аударды.

Айнұр Арғынбекова, ҚР Парламенті Сенатының депутаты:

- Жалпы білім беретін мектептер мен колледждерде жасөспірімдердің репродуктивті денсаулығы бойынша пән енгізу қажет. Қазіргі оқу бағдарламасында бұл қарастырылмаған. Біз балаларға жас ерекшеліктері мен психологиялық факторларды ескере отырып, нақты әрі дұрыс ақпарат беруіміз керек. Бұл тақырыпта тек қыздар емес, ұлдар туралы да айту маңызды.