Ол осы қызметті атқару кезінде жинақталған мұғалімдердің жеке дерегін пайдаланып, олардың атынан микроқаржылық ұйымнан несие алған. С. есімді азамат кәсіподақ атынан материалдық көмек көрсетеміз деген желеумен мұғалімдерді бейне тексеруден өткізген.

Ал рәсімделген несиелер С.-ның банктік шотына түсіп отырған. Ол қаржының аз бөлігін мектеп ұжымына материалдық көмек ретінде аударып, қалғанын өз қалауына жұмсаған.

Айыпталушы алаяқтық әрекетімен микроқаржы ұйымдарына жалпы сомасы 3,6 миллион теңгеден астам материалдық залал келтірген.

Сот отырысында мемлекеттік айыптаушы сотталушы С.-ны бес жыл кәсіподақ кеңесінің төрағасы қызметін атқаруға тыйым салып,төрт жылға бас бостандығынан айыруды сұрады. Өз кезегінде С. кінәсін мойындап, жасаған әрекетіне өкінетінін айтқан.

Сот үкім шығарарда оның кінәсін мойындағанын әрі материалдық шығынның бір бөлігін өтегенін ескеріп, 2 жыл 9 ай 18 күнге бас бостандығын шектеу жазасын тағайындады.

Үкім заңды күшіне енді.