Ауыл шаруашылығы министрлігі Қазақстаннан сәбіз экспорттауға тыйым салып отыр.

Аталған бастама елдің азық-түлік қауіпсіздігін қамтамасыз ету мақсатында жүзеге аспақ, деп жазады inbusiness.kz сайты.

Бұйрықтың жобасы "Ашық НҚА" порталында жарияланды.

"Транзитті қоспағанда, Қазақстаннан көліктің барлық түрлерімен үшінші елдерге және ЕАЭО елдеріне сәбізді экспорттауға 3 ай мерзімге уақытша тыйым салу белгіленеді", – деп жазылған жобада.

Құжатта бұйрықты әзірлеуге сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның шешімі негіз болғаны атап өтілген.

Айта кетейік, ҚР Сауда және интеграция министрлігі әлеуметтік маңызы бар азық-түлік тауарларының (ӘМАТ) тізімін кеңейтуді ұсынды. Министрлік тізімге енгізуге ұсыныс жасаған тауарлардың қатарында сәбіз де бар.