20 наурыз — 1 сәуір аралығында өтетін бұл жарыс түркі әлемінің бірлігін нығайту мақсатында ұйымдастырылуда.

Халықаралық футбол турнирі алғаш рет киелі Түркістанда ұйымдастырылмақ. Жарыс екі кезеңнен тұрады. 1-кезеңде 20 наурыз – 25 наурыз аралығында 2012, 2014 жылы туылған жасөспірімдер арасында жарыс өтеді.

2-кезең 27 наурыз – 1 сәуір аралығында, 2011, 2013, 2015 жылы туылған жасөспірімдер сынға түседі.

Турнирге Түркия, Қазақстан, Өзбекстан, Әзербайжан, Қырғызстан, Түрікменстан және басқа да түркітілдес елдердің клубтары қатысады. Атап айтқанда Түркиядан "Beshiktash academy – 2014", алматылық "Қайрат", өзбекстандық "Локомотив", "Пахтакор", Қырғызстаннан "Дордой" сияқты футбол клубтарының академиясының тәрбиеленушілері бар.

Естеріңізде болса, алғаш рет бұл бастама 2020 жылы көтерілген болатын. Түбі бір түркі тілдес ұлттар арасындағы ортақ турнир жобасы қарастырылып, қоғамның талқысына түсті.

Оған "Тұран кубогы" деп атау берді. Идея авторы – Гюркан Теоман еді. Ол негізі саясаттанушы және сол саясатпен айналысатын адам. Дегенмен футбол жарысы жайлы идеясы сол уақытта көпшілікке ұнағаны рас. Турнирдің негізі идеясы мынада еді: Халықтар арасындағы ынтымақтастық нығайып, қарым-қатынас күшейеді. Сонымен қатар, клубтар бір-бірімен футболшылар алмасады. Таланттарды байқайды.

Жалпы сол уақытта баспасөзде бұл жарыстың өтуі туралы ақпараттың өзі көп қызығушылық тудыртты. Дегенмен, бұл 2020 жыл идея күйінде қалып қойды. Ал, енді міне аталмыш жарыс биыл әз Наурыз қарсаңында Түркістанда өтетін болды.