Қазақстанда ата-аналардың өз міндеттерін тиісінше орындамауына байланысты құқықбұзушылықтар саны күрт артқан.

ҚР Оқу-ағарту министрлігі Балалардың құқықтарын қорғау комитетінің мәліметінше, соңғы бес жылда мұндай жағдайлар 3,5 есе көбейген, деп жазады inbusiness.kz сайты.

Комитет төрағасы Насымжан Оспанованың айтуынша, 2020 жылы ата-аналық міндеттерін дұрыс орындамағаны үшін 5 мың жағдай тіркелсе, 2024 жылы бұл көрсеткіш 19 мыңға жеткен. Сонымен қатар, кәмелетке толмағандардың түнгі уақытта ересектердің қарауынсыз жүруі де 2020 жылғы 65 мың жағдайдан 2024 жылы 112 мың жағдайға дейін артқан.

– Балалардың түнгі уақытта ойын-сауық орындарында болуы да алаңдатарлық деңгейге жетті. 2020 жылы 844 жағдай тіркелсе, 2024 жылы бұл сан 2406-ға дейін көбейді. Күн жылыған сайын балалардың терезеден құлауы, суға бату және басқа да қайғылы оқиғалар жиілейді. Талдау нәтижелері көрсеткендей, терезеден құлау оқиғаларының 80%-ында зардап шеккендер – 2-5 жас аралығындағы балалар. Ал суға бату жағдайларының 90%-ында балалар ата-ананың қарауынсыз жүрген, – деді Н.Оспанова Орталық коммуникациялар қызметінде өткен баспасөз мәслихатында.

Сонымен қатар, тұрмыстық жарақаттар, жол-көлік оқиғалары мен өрттер де балалар өміріне қауіп төндіріп отыр.

Жағдайды жақсарту мақсатында 2025 жылдың 1 қыркүйегінен бастап "ДОСБОЛLiKe" буллингке қарсы жобасы барлық мектептер мен колледждерге енгізіледі. Сондай-ақ, еліміздің барлық өңірінде балалар мен ата-аналарға кәсіби көмек көрсететін Психологиялық қолдау орталықтары ашылды. Қазіргі таңда бұл орталықтарда 250 мыңға жуық адам көмек алған.