WBO және IBF нұсқалары бойынша әлем чемпионы, қазақстандық боксшы Жәнібек Әлімханұлы әйгілі мексикалық боксшы Сауль Альвареске сесті сәлемдеме жолдады, — деп хабарлайды Skifnews.kz апарат порталы Massaget.kz-ке сілтеме жасап.

Әлем чемпионы Жәнібек Әлімханұлы мексикалық бокстың аңызы – Сауль Альвареске тағы да үндеу жасады. Kazakh Style лақап атымен танымал боксшы әлеуметтік желідегі X парақшасында Канелоға ескерту жасап, оны жеңетініне сенімді екенін білдірді.

"Егер ол дайын болса, менің де дайын екенімді білесіздер! Ал сіздер не болатынын жақсы білесіздер! Бұл жай ғана "ақша төленетін күн" емес. Бұл Канело үшін ыстық, жүйкеге тиетін, күйзелісті күн болады!" – деп мәлімдеді Жәнібек Әлімханұлы.

Қазақстандық боксшы бірнеше жылдан бері мексикалық чемпионнан жауап алуға тырысып келеді, алайда Сауль Альварес оның шақыруларына күні бүгінге дейін реакция білдірмеді.

Жәнібектің Канеломен жекпе-жек өткізуіне кедергі келтіретін басты факторлардың бірі – олардың салмақ дәрежесі мен гонорар айырмашылығы.

Айта кетейік, Жәнібек Әлімханұлының келесі жекпе-жегі 5 сәуірде Астанадағы "Барыс Аренада" өтеді. Оның қарсыласы – француз боксшысы Анауэль Нгамисенге. Жекпе-жекте қазақстандық боксшының WBO және IBF чемпиондық белбеулері бәске тігіледі. Сондай-ақ, бұл турнирде қазақстандық танымал боксшылар да өнер көрсетеді. Олардың қатарында жеңіліп көрмеген нокаут шебері Сұлтан Заурбек, WBC, WBA, IBO және IBF белбеулерінің бұрынғы иегері Батыр Жүкембаев және қазақстандық қыз боксшы Балауса Мүздіман бар.

Бұған дейін Жәнібек Әлімханұлы доминикандық чемпион Карлос Адаместің мәлімдемесіне қатаң жауап қайтарған еді. Сонымен қатар, WBO және IBF тұжырымы бойынша орта салмақтағы әлем чемпионы Жәнібек Әлімханұлы қарсыластармен жекпе-жек өткізу мәселелері туралы айтып, салмақ дәрежесін өзгерту жоспары бар екенін бөлісті. Ол орта салмақтағы әлем чемпионы Карлос Адамес өзінмен рингке шығудан қорқатынын да мәлімдеген болатын.