АҚШ Мәскеуге қарсы санкцияларды күшейтуі мүмкін.

Егер Мәскеу АҚШ пен Украина делегациялары ұсынған 30 күнге атысты тоқтату туралы шарттармен келіспесе, Вашингтон санкциялық қысымды қоса алғанда, одан да үлкен қадамдарға барады.

Бұл туралы Украина президенті Владимир Зеленский айтты, деп хабарлайды inbusiness.kz сайты "Европейская правда" басылымына сілтеме жасап.

"Менің түсінуімше, біз күшті қадамдар жасалады деген үмітіміз бар. Әзірге нақты мәліметім жоқ, бірақ біз санкциялық шаралар мен Украинаны күшейту туралы айтып отырмыз", – деді Зеленский тілшілерге берген сұхбатында.

Оның айтуынша, Мәскеуге бағытталатын қадамдар Вашингтонға және Ресей тарапымен болған келіссөз нәтижелеріне байланысты болмақ. Зеленский "соғысты аяқтағысы келетінін" баса айтты.

Америкалық сенатор, республикашыл Линдси Грэм Владимир Путин шабуылды тоқтату туралы келісімнен бас тартқан жағдайда, АҚШ Ресейге және оның сауда серіктестеріне қарсы жаңа қатаң санкциялар енгізетінін мәлімдеді.

Сөзінше, жаңа шаралар Ресейге ғана қатысты болмайды. Бұдан бөлек оның тауарларын, мысалы, мұнай, газ және уранды сатып алатын елдерге де әсер етеді.

"Егер Ресей бас тартса, біз олар үшін санкцияларды күшейтеміз", – деп жазды сенатор X желісінде.

Айта кету керек, осыған дейін Сауд Арабиясындағы АҚШ пен Украина делегацияларының келіссөздерінің қорытындысы бойынша Киев бір айға атысты тоқтатуға келісті.