ТМД елдерінен Қазақстанға 3,8 мың тонна шай әкелінді, бұл өткен жылмен салыстырғанда 25,6%-ке артық

Бұл туралы Caravan.kz медиа порталы Sputnik.kz-ке сілтеме жасап хабарлайды.

Биыл қаңтарда Қаақстанда 1,1 мың тонна өңделген кофе мен шай өндірілді. Бұл былтырғы қаңтармен салыстырғанда 9,2%-ке аз, деп хабарлайды Energyprom.kz.

Кофе мен шай әсіресе Алматыда көп өндірілді: 578 тонна — бір жыл бұрынғыға қарағанда 4,1%-ке артық. Одан кейінгі орындарда Алматы облысы, Шымкент, Қарағанды облысы және Астана тұр.

«Былтыр он екі айда елімізде 17,3 мың тонна өңделген шай мен кофе өндірілді. Бұл алдыңғы жылдармен салыстырғанда аз. Импорт көлемі 49,4 мың тоннаны құрап, бір жылда 3,1%- ке азайды. Қаңтар-желтоқсан қорытындысы бойынша ішкі нарықта сату көлемі 56,1 мың тонна болды, бұл өткен жылмен салыстырғанда 7,5%-ке аз», — деп жазылған хабарламада.

Өткен жылдың қаңтар-желтоқсан айларында 80,2 млн долларға 29 мың тонна шай импортталды. ТМД елдерінен Қазақстанға 3,8 мың тонна шай әкелінді, бұл өткен жылмен салыстырғанда 25,6%-ке артық. Негізгі жеткізуші — Ресей, ол Қазақстанға 15,1 млн долларға 3,7 мың тонна шай жеткізді.

ТМД-ға кірмейтін елдерден 25,2 мың тонна шай әкелінді — бұл өткен жылмен салыстырғанда 18,4%-ке аз. Мұнда Кения бас экспорттаушы: 33,4 млн долларға 10,5 мың тонна жеткізген. Жеткізілім бойынша жетекші елдердің қатарына Үндістан, Қытай, Вьетнам және Шри-Ланка да кірді.

Биыл қаңтарда кофе бағасы 2024 жылдың қаңтарымен салыстырғанда 8,9%-ке, ал шай бағасы 4,1% өсті. Әсіресе Батыс Қазақстан, Қызылорда, Астанада баға едәуір қымбаттады.