2024 жылы 209,9 млрд теңгеге стоматологиялық қызмет көрсетілді. Бұл өткен жылмен салыстырғанда 1,5 есе көп, әрі соңғы бес жылдағы ең жоғары көрсеткіш болды. Мұндай ақпаратпен 2025 жылы 5 наурызда Бірінші несие бюросы бөлісті, деп хабарлайды Zakon.kz.

"2024 жылы 209,9 млрд теңгеге стоматологиялық қызмет көрсетілді. Өткен жылмен салыстырғанда бұл көрсеткіш номиналды түрде 1,5 есе артып, кем дегенде бес жылдың рекордын жаңартты. Стоматологтар табысының күрт өсуін 2023 жылды қоспағанда, соңғы төрт жылдағы қалыпты үрдіс деуге болады. 2021 және 2022 жылдың қорытындысы бойынша, көрсетілген қызмет екі есеге жуық өсті. 2021 жылы халықтың бұл қызметті тұтынуды кенеттен күрт көбейтуі БЖЗҚ ақшасын пайдалануға рұқсат етілу болса, одан кейінгі жылы жеткілікті сома шегінің ұлғаюы да сеп болған", делінген Data Hub хабарламасында.

2024 жылы зейнетақы қорының ақшасын алуға шектеу енгізу, сондай-ақ жұмыс істейтін зейнеткерлерге бюджеттік төлемдерді тоқтату туралы шыққан ақпараттар аясында тағы өсім болды. Бұл бастамалардың ешқайсысы түпкілікті жүзеге асырылған жоқ, есесіне зейнетақы қорынан дереу алынған ақша көлемі көбейді.

"Былтыр стамотологиялық қызметтердің 80%-ы халықтың жеке қаражаты есебінен төленген, ал қалғанын мемлекет немесе компанияларға тиесілі. Екінші жағынан, стоматологиялық қызмет көлемінің өсуіне баға өсімі әсер еткен. 2021–2024 жылдары стоматологиялық қызметтердің құны жылына орта есеппен 11,5%-ға қымбаттап, 2022 жылы ең жоғары өсім – 18,3% тіркелді", — дейді сарапшылар.

Бұған дейін Қазақстандағы ең жоғары зейнетақының мөлшерін атаған болатынбыз. Еліміздегі ең бай зейнеткер айына 993 мың теңге алатын болып шықты.