Түркістан облысы Сарыағаш ауданындағы медресенің бас ұстазы Әбдужаппар Сманов ақсақал шәкірттеріне аяғын уқалатты ма? Имам әлеуметтік желіде өзіне қатысты тараған ақпаратқа қатысты пікір білдірді. Бұл туралы Skifnews.kz ақпарат порталы Sputnik.kz-ке сілтеме жасап хабарлайды.

Әбдужаппар қарияның айтуынша, ол жастайынан әкесінің аяғын уқалап, батасын алған адам.

"Әкем "жерден алған топырағың алтын болсын" демейінше аяғын уқалаушы ем. Мына ел арасында жайсыз пікір тарапты. 30 немерем бар, 15 ұл, 16 қыз немерем бар. Бәрі бөлек тұрады, бірақ үйіме келсе болды менің аяғымды уқалап, хисса-дастан тыңдағанды жақсы көреді", — дейді имам Әбдужаппар Сманов.

Ақсақалдың айтуынша, немерелеріне қазақтың тарихынан сыр шертіп, білім де береді.

"Немерелеріме қазақ хандығы, қазақтың батырлары қандай болды, Балуан Шолақ, Қажымұқан, бәрін үйретемін. Менің немерелерім бірге намазға барады, біреуін намаз оқы, аяғымды уқала деп қинамаппын. Медресеге барып аяғымды уқаласа, шәкірттеріме үлгі, тәлім болмай ма? Атасының аяғын уқалаған немереме "бар ары" деп сағын сындырмаймын", — дейді Әбдужаппар имам.

Бас ұстаздың айтуынша, мұндайды көрген шәкірттері ата-анасына құрмет көрсететіні хақ. Sputnik Қазақстан тілшісіне берген бейнесұхбатында бас ұстаз немерелерін атап-атап көрсетті.

Әбдужаппар Смановтың айтуынша, 30 немересі тұрғанда кісі баласына аяғын уқалатып, әдепсіздікке бармайды.

Білім басқармасы әлеуметтік желіде тараған видеодан соң бірден тексерген. Тіпті аяқ уқалаған балалардың құжаттарына дейін анықтапты.

"Сатыбалды Әбішұлы атындағы Сарыағаш медресесінде таң намазынан кейін студенттерге айтқан уағыз-насихат барысында медресенің бас ұстазы Әбдужаппар Смановтың аяғына жаттығу жасап отырған шәкірттері емес, өз немерелері мен жиені екені белгілі болды. Өз немерелері әрдайым атасына құрмет көрсетіп, ақ батасын алу үшін жаттығу жасап беріп, ілтипат білдіретінін анықтадық", — дейді білім басқармасы.

Бұл бейнежазбаға қатысты тіпті Қазақстан мұсылмандар діни басқармасы да түсініктеме берді.

"Түркістан облысы Сарыағаш ауданындағы мешітте болған оқиға әлеуметтік желілерде тарап, қоғамның түрлі пікір қайшылығын тудырды. Осыған орай Қазақстан мұсылмандары діни басқармасы қасиетті орында қоғам наразылығын тудырған әрекетке жол бергені үшін мешіт имамына ескерту жасады", — дейді Қазақстан мұсылмандар діни басқармасы.

Айта кетейік, аяқ уқалаған балалар да бейнежазба жариялап, шәкірт емес, өздерінің атаның батасын алғысы келген немерелер екенін айтты.