Елорданың және республикалық маңызы бар қалаларды абаттандырудың жаңа нормалары бекітілді .

Қалаларда жарнама қызметін реттеу және қоғамдық орындарда көшедегі аудиожарнаманы пайдалануға тыйым салу, сондай-ақ тротуарлар мен автожолдарда сыртқы жарнама орналастыруға шектеу енгізу көзделіп отыр. Бүгін Мәжілістің жалпы отырысында астананы және республикалық маңызы бар қалаларды дамыту мәселелері туралы заң жобасы бірінші оқылымда мақұлданды.

Рухани Әбдірахман, тілші:

- Қалалардың сәулеттік келбетін сыртқы жарнамалар ғана емес, ретсіз орналасқан маңдайшалар, қоғамдық орындардағы аудиожарнамалар бұзып тұр. Алайда шаhарлардың эстетикалық келбетіне теріс әсер етіп отырған бұл жағдайлар бүгінде заңбұзушылық саналмайды әрі ешбір әкімшілік шара қарастырылмаған. Мәселені реттейтін заң қабылдайтын кез келді. Вице-премьер, Ұлттық экономика министрі Серік Жұманғарин негізгі өзгерістердің мақсатын түсіндірді.

Серік Жұманғарин, ҚР Премьер-министрінің орынбасары – Ұлттық экономика министрі:

- Тротуарларда, веложолдарда, автожолдарда және көшелерде сыртқы (көрнекі) жарнаманы орналастыруға тыйым салу ұсынылады. Сонымен қатар аталған нормаларды Әкімшілік құқық бұзушылық туралы кодексіне енгізу мәселесі пысықталуда. Заң жобасының екінші бағыты жер мәселелерін реттеуді көздейді.

Ірі қалаларда пәтерге тұрғындарды шектеусіз тіркеу бүгінде үлкен мәселеге айналған. Тіпті, қағаз жүзінде 800 адам бір мекенжайға тіркелген факті бар. Енді елордада тұрақты және уақытша тіркеуге алудың шекті нормативі белгіленеді. Тек бұл ереже меншік иесінің жақын туыстарына қолданылмауы тиіс. Ал, нақты тұрмайтын азаматты тіркеуден шығармаған пәтер иесі үшін жауапкершілік күшейеді.

Ерсін Өтебаев, Астана қаласы әкімінің орынбасары:

- Бұл мәселе қалалық мәслихаттың құзіретіне кіреді. Адам басына шаққандағы пәтер ауданының шекті шаршы метрі белгіленеді. Жатақханадағы 10 шаршы метрге 1 мың адамға дейін тіркелген «резеңке пәтерлер» проблемасын жақсы білесіздер. Мәселені реттеуіміз керек. Көп жағдайда ол адамдар тіркелген мекенжайы бойынша тұрмайды.

Айдын Кәрімов, Шымкент қаласы әкімінің орынбасары:

- Осы оқылымда депутаттардың қолдауымен бірқатар ұсыныстар қолдау тапты, өкілеттіктер артуда. Айта кететін болсақ, бірөатар құзіреттер берілуде бұл реновациялық бағдарлама жасау. Қаламызда 200-ге жуық апатты жағдайдағы және тұруға қолайсыз үйлер бар. Оларды жаңартып көшіру бойынша бағдарлама қабылданатын болады. Бұл жұмысты өткен жылы біз бастаған болатынбыз.

Ақылы автотұрақтар мемлекет меншігіне өте ме? Кейінгі 3 жылда астаналықтар көлігін ақылы орындарға қойғаны үшін 720 млн теңге төлесе, соның 610 млн теңгесі жекенің қалтасына кеткен. Депутаттар бұл қаражат қазынаға түсуі тиіс, деді.

Ерсін Өтебаев, Астана қаласы әкімінің орынбасары:

- Қазіргі таңда сол компаниямен келісім-шартты бұзу туралы қол қойылды. Мүлікті мемлккет тарапына өткізу жұмыстарын жүргізіп жатырмыз. Алдағы уақытта тек мемлекттік мекеме бұл жұмыспен айналысатын болады.

Заң жобасының келесі бағыты елорданың «жасыл белдеуін» сақтауға арналады. Оны сақтау ерекше күтімді талап етеді. Енді жасыл аймақтың шекарасын өзгерту мәселелерін әкімдік емес, Үкімет қадағалайды. Табиғат аясына теріс әсер ететін түрлі қызметке тыйым салынады.

Болатбек Нажметдинұлы, ҚР Парламенті Мәжілісінің Депутаты:

- Астананың санитарлық-қорғау жасыл аймағын басқару қағидаларын белгілеу ұсынылады. Оның шекараларын өзгерту туралы шешімді Үкімет қабылдайды. Бұл жергілікті атқарушы органның ұсынуы бойынша ғана бекітіледі. жерді қала мұқтажы үшін пайдалану нормаларын нақтылау ұсынылып отыр. Заң жобасымен жұмыс барысында депутаттар республикалық маңызы бар қалалар мен астананың жергілікті өкілді және атқарушы органдарының құзыреттерін кеңейтуге бағытталған түзетулер енгізді.

Осылайша жаңа құжат жер қатынастары, сәулет, құрылыс, көші-қон, жарнама, экология және өзге мәселелер бойынша 1 Кодекспен 6 Заңға түзетулер енгізуді көздейді. Бүгін айтылған бірқатар ескерту екінші оқылымға дейін пысықталады.