Бүгін Бурабайда өткен Ұлттық құрылтайда Президент мемлекеттік әлеуметтік тапсырысқа қатысты заң әзірлеуді тапсырды, деп жазады Egemen.kz ақпарат агенттігі.

«Құрылтай мүшелері Зүлфия Байсақова мен Бану Нұрғазиева мемлекеттік әлеуметтік тапсырыстың критерийлерін қайта қарау және үкіметтік емес ұйымдар туралы заңнаманы жетілдіру қажеттігін айтты.

Азаматтық сектор реформаларды жүргізу және қоғамды дамыту ісінде маңызды рөл атқарады. Мемлекет пен үкіметтік емес ұйымдардың серіктестігі өзекті мәселелерді шешуге, жасампаз құндылықтарды дәріптеуге және ұлттың жаңа сапасын қалыптастыруға ықпал етеді», — деді Қасым-Жомарт Тоқаев.

Сондықтан мемлекеттік әлеуметтік тапсырыстың тиімділігін арттыру үшін қазіргі заманның талаптарына сай келетін жеке заң керек.

«Әрине, заң жобасын әзірлеу барысында құжатқа терең және жан-жақты сараптама жасалуға тиіс. Құзырлы органдар сарапшылар мен қоғамдық ұйымдарды тарта отырып, бұл мәселемен айналысуы керек», — деп толықтырды сөзін Мемлекет басшысы.