Бокстан Сербияда өтіп жатқан әйелдер арасындағы әлем чемпионатының жартылай финалдық жекпе-жектері мәресіне жетті.

70 келіде өнер көрсеткен Наталья Богданова 1/2 финалда әлем чемпионы, Ирландия боксшысы Лиса Едел О’Руркпен кездесті.

Қос спортшы да алма-кезек басымдыққа ие болып, нәтижесінде 3:4 есебімен айқас Лиса Едел О’Рурктың пайдасына шешілді.

+81 келідегі Елдана Талипова 1/2 финалда қазіргі Еуропа чемпионы Дариа Сазоновамен жолықты. Әйтсе де жерлесіміз барлық раундта өте сенімді қимылдап, төрешілердің бірауыз шешімімен жеңіске жетті.

63 келідегі Аида Әбікеева 1/2 финалда Еуропа чемпионатының жүлдегері, Ресей атынан шыққан Елена Бабичева жолықты. Аида жекпе-жек барысында қарсыластың екпініне төтеп беріп қана қоймай, нық соққыларын жиі дарыта білді. Есеп: 5:0.

50 келідегі Алуа Балқыбекова Солтүстік Кореяның тағы бір өкілі Ан Куммен 3 раунд бойы айқасты жоғары қарқында өткізді. Ан Кум алдыға тоқтаусыз ұмтылып, сериялы соққыларға иек артса, Алуа қарымта шабуылда өз есесін жібермеді. Әр шабуылдан шебер қорғана білген отандасымыз тағы бір мәрте алтынға таласуға мүмкіндік алды. Есеп: 5:0.

48 келідегі Назым Қызайбай Солтүстік Кореяның спортшысы Хонг Кионг Рионгпен кездесіп, жерлесіміз жекпе-жекті өте сауатты өткізе білді. Соққы алмасу, қорғаныста пен шабуыл жасау барысында да Назым нәтижелі қимылдап, төрешілер шешімі бойынша 4:1 есебімен басым түсті. Бұған дейін Назым 2014 және 2016 жылдары да финалға шығып, чемпион атанған еді.

60 келідегі дебютант Виктория Графеева 1/2 финалда Ресей тумасы, Сербия атынан сынға түскен Наталья Шадринадан жеңісті жұлып алды.

Атақты әрі тәжірибелі қарсыласпен жұдырық түйістірсе де, отандасымыз соңғы секундқа дейін барын салып, жеңіске лайық екенін мойындатты. Есеп: 4:1

Осылайша, әлем чемпионатының финалында 5 қазақстандық боксшы сынға түседі.

Финалдық жекпе-жектер 16 наурызда, Қазақстан уақыты бойынша 21:00-де басталады.