Иығымен көк тіреген тау аңғарларының әсем көрінісін көздің қарашығындай сақтап, ондағы орманның оталмауын қадағалап жүрген тәжірибелі орманшының бірі – Болатхан Шалдырмасов. «Әке көрген оқ жонар» демекші , туған жердің табиғатын қорғауды бала жастан бойына сіңіріп өскен азамат осы салада ширек ғасырдан астам уақыт тапжылмай еңбек етіп келеді.

«Әкем Найманбай Екінші дүниежүзілік соғыс ардагері, ІІ топтағы мүгедек болатын. Бірақ ешқашан денсаулығын сылтауратып жұмыстан жалтарған емес. 4 сыныптық қана білімі бар еді, соған қарамастан орманшылық туралы білімі барынша терең, тәжірибелі кісі болды. Еңбекқорлығының арқасында Сарыжаз орман шаруашылығын 40 жылға жуық басқарып, абыройлы еңбек етті. Өскелең жастарды еңбекке баулыды. Ес білгелі әкемді үнемі ат үстінде көретінмін, аттарын баласындай баптау­шы еді. Осы қасиет маған да дарыған», деген орманшы Болатхан Найманбайұлы көшеттерді күтіп-баптауға бала жастан машықтанғанын тілге тиек етті.

«Ол жылдары ауылдағы естияр балалар демалыс кезінде бос жүрмей, ұжымшарда, орманшылықта еңбек ететін. Бұл бір жағынан ата-анаға көмек, екінші жағынан балаларды еңбекке баулу мектебі болды. Мен де осы мектептен өттім. Бұл кезең әрі демалыс, әрі еңбекке үйрену еді. Балалық шақтағы талай қызық осы тау бөктерінде өтті. Сол кезде отырғызған қарағай, шыршаларымыз қазір ну орманға айналып, жайқалып тұр», деп қайта оралмас жалаулы жылдарды сағынышпен еске алады.

Әке жолын жалғастырып орманшы болғанына 25 жылдан асқан Болатхан Найманбайұлы өзі туып-өскен өңірге ағаш отырғызып, күтіп-баптаудың нағыз маманы, майталманы атанған. Табиғат жанашыры қоршаған ортаны қорғауда көпке үлгі боларлық іс тындырып, өмірлік тәжірибесін жастардың бойына талмай сіңіріп келеді.

Орманшының еткен еңбек, төккен тері зая кеткен жоқ. Бірнеше рет облыстық, аудандық әкімдіктің, өзі қызмет ететін мекеменің мақтау қағаз, алғысхаттары мен бағалы сыйлықтарына ие болды. Экология және табиғи ресурстар министрлігі Орман шаруашылығы және жануар­лар дүниесі комитетінің ІІІ дәрежелі «Қазақстан орманын қорғаудағы мінсіз қызметі үшін» медалімен марапатталған.

«Бұл – маған ғана емес, өзім еңбек еткен ұжымға да үлкен мәртебе. Қазір ұжымда сайдың тасындай іріктелген орманшы жігіттер үзеңгі қағысып бірге еңбек етіп жүр. Сондықтан қандай да бір жетістікке жетуіме әріптестерімнің де үлесі бар. Ата-бабаларымыз «Жалғыз ағаш орман емес, жалғыз кірпіш қорған емес» деп тегін айтпаған», деп ағынан жарылды Болатхан.

Орман – келер ұрпаққа қалатын мұра, оны күтіп-баптау – әр азаматтың міндеті. Әкеден балаға жалғасқан Шалдырмасовтар әулетінің орманшылық жолы – кәсіпке адалдықтың жарқын үлгісі. Осындай еңбекқор жандардың арқасында қазақтың кең даласы мен аймақ-атырабы жасыл орманға айналып, табиғат өз көркін сақтап келеді.

Алматы облысы