Халқымыздың ұмыт бола бастаған төл өнері – сырмақ тігу ісі қайта жанданып келеді. Павлодарда «Сырмақ Time» байқауына 30 шебер қатысып, өз өнерлерін паш етті, деп хабарлайды 24kz.

Қазылар алқасының шешімімен аудандық кезеңде үздік шыққан 11 шебер облыс орталығында өтетін байқауға жолдама алды. Қатысушылардың ең жасы 30-да, ал егдесі 75 жаста.

Қарлығаш Қасиетова да тамашалап қайтты.

- Қошқар мүйіз, арқар мүйіз, сыңар мүйіз. Бұл қолөнер шеберлерінің сырмақ пен текемет басқанда жиі қолданатын ою-өрнек түрлері. Шеберлердің қолынан шыққан бұйымдар көздің жауын алады. Жасы 75-ке келген Күріш Ханый алғашқы сырмағын небәрі 20 жасында тігіпті. Ісмер жан ұршығы мен инесін қолынан әлі де тастамаған.

Күріш Ханый, қолөнер шебері:

- Қыздың жасауына беріледі екен ерте кезде. Кілем жоқ қой ол кезде. Кілем болмағандықтан, сосын сол мына киізді басып отырып, осындай сырмақ жасап береді екен қыздың жасауына. Ерте кезде солай болды. Мен енді өзі ойымда бар 1975 жылы үйленгеннен кейін ең алғаш сырмақ тіктім, сонда 12 күнде бітірдім сол сырмақты. Алғашқы тіккен сырмағым сол енді.

Күріш апай сырмақты қозының жүнінен басып, түйенің шудасынан иірілген жіппен көмкереді. Ал, байқауға қатысушы Алтынхан Қамшыбайдың Моңғолия елінен Павлодар облысына қоныс аударғанына екі жыл болыпты. Атажұртқа бейімделіп қана қоймай, салт-дәстүрлерді жаңғыртуға белсене кірісіпті.

Алтынхан Қамшыбай, қолөнер шебері:

- «Осындай «Сырмақ Time» деген сайыс өткелі жатыр, соған қатыс», — деді. Осыған қатысқаныма қуаныштымын енді. Бұрынғы ата-бабамыздан қалған мұрасын енді жаңғыртып жатырмыз.

Ұйымдастырушылардың айтуынша, «Сырмақ Time» облыстық байқауына арнап тігілген сырмақтар музей қорына тапсырылады. Қолөнер шеберлерінің үздік еңбектері келешекте музейдегі көне жәдігерлерді алмастырады.

Уәсилә Нұрмұхамбетова, ұлттық қолданбалы өнер орталығының жетекшісі:

- Мына біздің ұлттық қорымыз бар ғой, мына жәдігер дейміз ғой, соның барлығы көне. Олар отыз-қырық жылдан асты, елу-жүз жылға дейін бар. Оның барлығы тозады, сол үшін қазір біз оның бәрін жаңартуымыз керек.

Бастапқы кезеңде байқауға 30 үміткер өтініш беріпті. Аудандық байқауда топ жарған 11 қолөнерші облыстық байқауға іріктелді. Ұлттық құндылықты жаңғыртып, төл өнерімізді кеңінен дәріптеуді мақсат еткен «Сырмақ Time» жобасы ары қарай жалғаса бермек.

Авторлары: Қарлығаш Қасиетова, Дәулет Қошқарбаев