0:00:00

Жаңалықтарды Telegram арнамыздан оқыңыз !

Бүгін «Наурыз жұмыскер» ипотекалық бағдарламасының басталуына байланысты банк бөлімшелерінде абыр-сабыр, ығы-жығы халық көп. Әзірге 313 адам жеңілдетілген несиеге ие болды. Осылайша 9 млрд теңге игерілді. Биылғы жоспарға сәйкес, шамамен 2400-ден аса адам пәтермен қамтылуы тиіс. Тілшіміз Ақниет Балтанова құжатын тапсырып, жанталасқан жұмысшы мамандармен тілдесіп қайтты.

Ақниет Балтанова, тілші:

Бүгін «Наурыз жұмыскер» ипотекалық бағдарламасына құжат қабылдау басталды. Мен Астанадағы «Отбасы банк» бөлімшесінің біріне келдім. Мына ұзын-сонар кезекті қараңыз. Себебі бұл бағдарламаның талаптарына сәйкес, кім бірінші құжат өткізсе, соның жеңілдетілген несиеге ілігуге мүмкіндігі жоғары. Сондай-ақ құжаттар онлайн қабылданбайды. Міндетті түрде банк бөлімшесіне келіп, менеджерге өткізесіз. Сол себепті бүгін дәл осындай қарбалас. Бір ғана бөлімшеде емес, жалпы барлық банк бөлімшелеріндегі жағдай осы.

Өзім ТЭЦ-2-де жұмыс істеймін. Осы бағдарлама туралы барлық жерде айтылған соң қатысып көрейін деп келдім. Кезекте таңғы 8-ден тұрдым. Кезегім келіп, мақұлдады.

Мен осы Астанада 6 паркте автобус айдаймын. Түнгі сағат 1-де келіп, осы жерде кезек алдық. Қазір құжатымды тапсырып қойдым. Енді мақұлдауын күтіп отырмыз.

Жолдасымның мамандығымен келіп тұрмыз. Таңғы 5-тен бастап, адамдар келіп, кезекке тұрып жатты. Мысалы біз 73-і болып тіркелдік. Бірақ одан да көп, 200-ден аса адам болды, сырт та толық болды.

Жобаға 72 млрд теңге бөлінді. Бұл қаражат шамамен 2 440 жұмысшы маманның баспана мәселесін шешеді. «Бағдарлама бірнеше жыл жалғасады. Биыл ілікпегендер алдағы жылдары қайта бақ сынауға мүмкіндігі бар», — дейді банк өкілдері. Қазір менің жанымда банк бөлімшесінің директор орынбасары Дәрия ханым тұр. Айтыңызшы, құжат қабылдау қай уақытқа дейін жалғасады?

Дәрия Батенова, «Отбасы банк» АҚ орталық филиалы директорының орынбасары:

Құжат қабылдау бүгінгі күннен басталса, қаржыны толық игергенше, өтінімді қабылдай береміз.Таң атқаннан түске дейін 276 бізде өтінім қабылданды. Оның 37 өтінімі Астана қаласында қабылданды. Бұл өтінімдердің бәрі мақұлданып, енді бұл клиенттеріміз өз үйлерін іздеуге кірісті.

Иә мінекей, естіп отырсыздар, жарты күннің ішінде 200-ден аса адам баспаналы болды. Бұл керемет, қуанышты жаңалық. Сондықтан әлбетте, құжат тапсыруға, тезірек келіп, тізімнен өтуге асығу қажет.

Ақниет Балтанова