Шығыс Қазақстанда биыл екі жаңа әуежайдың құрылысы басталып, пайдалануға беріледі, деп хабарлайды 24KZ. Оның бірі табиғаты ерекше Қатонқарағай ауданында, екіншісі тарихи мұраға бай Зайсан ауданында салынады. Әуежайлардың құрылысына жауапты мердігер компания мен қаржы көздері толық дайын. Көптен күткен бұл жоба бір жарым айдан кейін іске асырыла бастайды.

Биыл Президенттің тапсырмасына сәйкес еліміздегі авиация саласында бір емес, бірнеше ірі инфрақұрылымдық жоба іске асады. Атап айтқанда, Шығыс Қазақстан облысындағы шекара маңында екі жаңа әуежайдың құрылысы басталады. Оның бірі Қатонқарағай ауданында, екіншісі Зайсан ауданында бой көтереді. Мемлекет басшысы IV Ұлттық құрылтайда бұл стратегиялық жобаның маңыздылығына ерекше тоқталды. Қазіргі уақытта аймақта осы бағытта нақты шаралар қолға алынып, құрылыс жұмыстарына дайындық басталып кетті.

Қуаныш Акрамов, ШҚО жолаушылар көлігі және АЖ басқармасы басшысының орынбасары:

- Жалпы биыл жылдың аяғында әуежайды іске қосу жоспарланып отыр. Жалпы әуежайдың құрылысы аяқталғаннан кейін ол тек ішкілік емес, сонымен қатар осы әуежайлардан халықаралық әуе рейстерін ұйымастыру жоспарланған.

Қос әуе қақпасын «Қазаэронавигация» республикалық мемлекеттік кәсіпорны салуды жоспарлап отыр. Жобаға 50 миллиард теңге бөлінеді. Ұшу-қону жолағының ұзындығы 2200 метр, ал әуежай сағатына 150 жолаушыға қызмет көрсете алады. Сарапшылардың пікірінше, облыстың туристік әлеуетін толық пайдалану үшін құрылыс жұмыстарын барынша жылдам аяқтау маңызды.

Сымбат Рамазанов, ШҚО туризм кеңесінің төрағасы:

- Әсіресе басқа облыстардан келетін туристер үшін оларға жылдам жету үшін үлкен мүмкіндік ашылады деп ойлаймын, сондықтан да туризмнің дамуына үлкен бір септігін тигізбекші. Жаңа аэропорттардың ашылуы бұл турзмге жаңа леп алып келеді және туристерге беретін турмаршруттардың ішінде уақыттың шектелуіне жылдам жетуіне үлкен жағдай жасалады деп ойлаймын.

Заманауи әуежайдың салынуына әсіресе шекара шебіндегі ел-жұрт қуанышты. Мәселен, Зайсандағы қазіргі нысан әбден ескірген. Әуе кемесі Өскеменмен екі ортада ғана ұшады. Енді жаңа әуе айлағы бой көтерсе, бір ғана Зайсан емес, көршілес бірнеше ауданның мәселесі бірден шешілмек.

Марат Уәли, Зайсан қаласының тұрғыны:

- Зайсан халқы құптап жатыр, қуанып жатыр. Енді шындығында бұл аэропорт салынатын болса, біздің жүріп-келуімізге, барып-келуімізге үлкен септігін тигізеді. Ең бірінші мына халықтың алыс жатқан шекаралық ауданда тұрақтауына өте әсерін тигізе ме деген ойдамыз. Бұның сыртында мына көрші аудандарға да, оңтүстіктегі көрші аудандарға, мына жақтағы Марқакөл ауданы, Күршім ауданы, Тарбағатай аудандарына да өзінің септігін тигізеді барып-келуіне.

Мердігер компания әуежайлар құрылысын мамыр айында бастауды жоспарлап отыр. Жыл соңына дейін құрылысты аяқтап, нысанды пайдалануға беруді көздейді.

Авторлары: Эльмира Ахметова, Жігер Бабаханов