Қызылордада облыс орталығы мен Тасбөгет кентін байланыстыратын көпірдің бір бөлігі опырылды, — деп хабарлайды Massaget.kz тілшісі.

Оқиға кадрлары әлеуметтік желілерде тарады. Видео авторының айтуынша, оқиға 19 наурызда кешке болған.

"Бұл көпірдің тарихы өте әріде жатыр. Мұнда көлік көп жүреді. Қандай жағдайда екенін білмейміз, бірақ жиегі құлағанын көріп отырмыз. Былтыр дәл осындай жағдай көпірдің екінші жағында болған еді. Көпірдің астында ересектер мен жастар жиі жиналады. Бақытымызға қарай, бүгін ешкім болмаған, ешкім зардап шеккен жоқ", – деді видео авторы.

Қалалық әкімдіктің ТҮКШ бөлімінің өкілдері жергілікті тұрғынның жазбасына жауап беріп, көпір қалпына келтірілетінін мәлімдеді.

"Назарбаев даңғылынан Тасбөгет кентіне баратын жолдағы көпірдің қаңқасы тозған... Алдағы уақытта көпірді күтіп-ұстауға жауапты мердігер мекеме "Әлем Транс" ЖШС жөндейді", – деп жазылған хабарламада.

Кейінірек әкімдік қызметкерлері көпірдегі қауіпсіздікті қамтамасыз ету бойынша шаралар жүргізіп жатқаны белгілі болды.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!