Мемлекет басшысының Ұлттық құрылтайда берген тапсырмасына сәйкес Өскемендегі гематология орталығының құрылысына 33 млрд теңгеден астам қаражат бөлінді, деп хабарлайды 24kz.

Медициналық мекемеде 148 орындық стационар және 24 орындық қонақ үй қарастырылған. Бас ғимаратта заманауи медициналық құрал-жабдықтармен қамтылған зертханалар мен бөлімшелер болады. Үкімет Арнаулы мемлекеттік қордан өзге де әлеуметтік маңызы бар нысандардың құрылысына қаржы бағыттады. Олардың қатарында 7 мектеп, 2 спорт кешені, стадион, көпсалалы аурухана сияқты жобалар бар.

Мәдина Мырзабекова, ШҚО Денсаулық сақтау басқармасы басшысының орынбасары:

- Орталықта күндізгі және тәулік бойы жұмыс істейтін стационар, кардиология, кардиохирургия, химиотерапия бөлімшесі қарастырылған. Біз ультражүйелік жабдықты орнатамыз. Мұнда жоғары технологиялық медициналық операцияларды жасай аламыз. Бұл науқастарға және біздің мамандарға көп мүмкіндік береді.