Бұл арқылы ел тұрғындары жеке деректерінің таралып кеткен-кетпегенін тексере алады.

Қазіргі уақытта жаңа функцияның соңғы тестілеу кезеңі аяқталып жатыр, деп хабарлайды inbusiness.kz сайты.

Web-Totem ЖШС директоры Руслан Төргелдиновтың сөзінше, жаңа Nomad Guard сервисі eGov жүйесіне интеграцияланған. Бұл туралы ол Орталық коммуникациялар қызметі алаңында өткен брифингте айтты.

– Сіз электрондық цифрлық қолтаңба арқылы авторизациядан өткен кезде, жүйе сіздің ЖСН, аты-жөніңіз және мобильді азаматтар базасындағы деректеріңізді, соның ішінде электрондық поштаңызды пайдаланады. Дәл осы деректер бойынша жүйе ақпараттың таралып кетуін тексереді. Егер сіздің деректеріңіздің таралып кеткені анықталса, сізге 1414 нөмірінен хабарлама келеді. Сонымен қатар, eGov Mobile мобильді қосымшасы арқылы да ескерту аласыз, – деді Web-Totem ЖШС директоры.

Руслан Төргелдинов қазіргі уақытта жаңа функцияның соңғы тестілеу кезеңі аяқталып жатқанын жеткізді. Жақын күндері жүйе қосымшада қолжетімді болмақ. Яғни, әрбір азамат өз деректерінің таралып кеткен не кетпегенін оңай тексере алу мүмкіндігіне ие.