Дубайда әз-Наурыз қазақы нақышта тойланды, деп хабарлайды 24KZ. Сыртта жүрген отандастар кең дастарқанда бас қосып, жыл басын атап өтті. Ән-жырдан шашу шашылып, күй күмбірледі. Игі іс-шараға әмірлікте өз кәсібін бастаған отандасымыз ұйытқы болды.

Әз-Наурыз тұтас шығыс халықтарына ортақ мереке болғанымен, араб мемлекеттерінде кең тойлана бермейді. Соған қарамастан сыртта жүрген отандастар қазақылықтан алыстаған емес. Ұлтымыз үшін ұлық мейрамдарда жиі бас қосып, мәре-сәре болады. «Соның ішінде Наурыздың тіпті жөні бөлек», – дейді кәсіпкер Жарқын Әбділда. Ол Дубайда үшінші мейрамханасын ашып отыр. Жұбайымен жеке кәсіп бастағанына 20 жылға жуықтаған. Қазақстандық көпбалалы отбасы мұнымен тоқтап қалмай, бизнес аясын кеңейте бермек.

Жарқын Әбділда, кәсіпкер:

- Біз жылда Наурыз тойлаймыз. Бұған дейін басқа мейрамханада бас қосатынбыз. Оны жұрттар біледі. Биыл енді мына жердегі тойлаудағы мақсат бұл жаңадан ашылып отыр. Оның үстіне ораза мен әз-Наурыз келіп қалды. Жаңа ауданда, жаңа кафеде қазақтардың басын қосу бір идея болды.

Мерейлі мерекеде ашылған жаңа мейрамхана келушілерге қазақтың қазысы мен көжесін, бауырсақ, құрт-майын ұсынды. Мақал-мәтел, ұлттық тағам және ойын атауларын табу жарысында үздік шыққандарға кәдесыйлар таратылды. Бұл сында ақтаулық Гаухар Сүйеуова жеңімпаз атанды.

Гаухар Сүйеуова, қазақстандық турист:

- Демалушылармыз. Бірінші күніміз. Кешкісін ауызашарға келіп, керемет кештің куәсі болдық. Баршаңызға Наурыз құтты болсын! Бағымен жақсылығымен келсін!

Гүлназ Жұмабаева, қазақстандық турист:

- Барлықтарыңызға осы жылға табыс, бақыт тілеймін! Еліміз тыныш, аспанымыз ашық, ұйқымыз аман болсын! Қарттарымыз аман болсын! Гүлденген, әдемі елде өмір сүрейік!

Жалпы Әмірлікте Жарқын Әбділда секілді қазақтың ұлттық ас-мәзірін дәріптеп жүргендер некен-саяқ. Өзге елде дүниеге келсе де, тілі мен ділін ұмытпай, құндылықтарын кең насихаттап келеді. Қазір сүйікті ісі ірі кәсіпке айналып, тұрақты табыс әкеле бастаған.

Мунира Әбдуәли, мейрамхана менеджері:

- Негізі қазақтарды қимылы аз, жалқау деп айтады ғой. Олай емес. Кішкене тырысса, өте жақсы дамуға болады. Жаңа мейрамханадағы алғашқы Наурызымыз. Жылда осылай қазақтарды жиып тойлаймыз.

Мейрамхана иелері еліміздің Тәуелсіздік күнін де қалың қарашамен атап өтеді. Наурызда қауышқан жұрт осы үрдістің үзілмей, жалғасын табуын тіледі.

Авторы: Рауан Мыңбай