Наурыз мерекесінде Шымкент қаласының қуыршақ және жасөспірімдер театры

Өзбекстанның кішкентай көрермендеріне Михаил Супониннің «Кел, бірге ойнайық!» спектакілін ұсынды. Қойылымның ерекшелігі сол — балалар әртістермен бірге сахнаға шығып, жасырылған жұмбақтың жауабын табады. Ертегі әлеміне бірге саяхаттап, жақсы мен жаманның аражігін ажыратады. Премьера екі ел арасындағы мәдени байланыстарды нығайтуға бағытталған.

Қоянның қырсықтығы мен тұйықтығы, айналасындағы достарына қиянат жасауы залдағы кішкентай көрерменнің ашуын туғызды. Балалар сахнаға шығып, ұзын құлақтың әрекетін сөгеді. Режиссёрдің де ойлағаны сол. Жақсы мен жаманды ажыратып, ата-ананың тілін алып, достыққа берік болуға үгіттеу.

Самат Алтай, спектакльдің қоюшы режиссёрі:

- Екі ел арасындағы достықты мәдениетті байланыстыру басты мақсатымыз. Балалар бәрімізге ортақ. Оларға қуаныш сыйлау барша мәдениет қызметкерлерінің міндеті деп есептейміз.

Өзбекстанның мәдениет министрлігі жанынан құрылған комиссия спектакльді бірден қабылдап, қойылымның мазмұнын жоғары бағалаған. Себебі осы тектес шығармалар балаларды мейрімділікке шақырып, жақсылық жасауға ой салады.

Пирназар Имомназаров, Бұхара театрының режиссёрі:

- Бұл спектакльде достық, ата-ана мен бала арасындағы махаббат жақсы суреттелген. Кішкентай көрермендер әртістермен бірге сахнаға шығып, жасырылған жұмбақтың жауабын табуға тырысты. Бұл өз кезегінде балалардың театрға деген қызығушылығын оятты. Біз алдағы уақытта да шетелдік режиссёрлермен қоян-қолтық жұмыс істеуді жалғастырамыз.

Қазақ пен Өзбек театрлары арасында тығыз қарым-қатынас орнаған. Былтыр біздің елге ала шапанды ағайынның 4 театры гастрольдік сапармен келсе, Қазақстанның 3 мәдени ұжымы өзбек сахнасында өнер көрсеткен. Осылайша театрлар да екі елдің байланысын арттыруға өзіндік үлестерін қосуда.

Дулат Нуркин