Жасы жүзге жуықтап қалған соғыс ардагері Владимир Белозёров белсенді ұзақ өмір сүрудің құпиясымен бөлісті. Қан майданды көрді, окопта тоңып, толарсақтан саз кешіп, ауыр жарақат алды. Бірақ мойымады. Қарт майдангердің жасы жүзге таяса да, қимылы ширақ. Ол үнемі жаттығу жасап, бау-бақшасын өзі баптайды. Бұл құпияның сыры неде?

Жасы ғасырға жуықтаған Владимир Белозёров сергек жүру үшін күн тәртібін қатаң сақтайды. Таңмен таласа тұрып, физикалық жаттығулар жасап, күніне екі рет серуендеп қайтады.

Владимир Белозёров, соғыс ардагері:

- Бұйырса, 3 тамызда 100 жасқа толамын. Бірақ елдер менің 100 жаста екеніме сенбейді. Кіммен сөйлессем де, «80 жаста шығарсыз», – дейді. Оған қуанып қаламын, 20 жылға жасартып жатқаны жақсы. Бірақ өзіңді жас сезініп, тың жүру үшін көп еңбектену қажет.

Шымкентте туған Владимир ақсақал 17 жасында майданға аттанды. Үшінші Украин майданында соғысып, Днепрден өткенде басынан соққы алып, ұзақ уақыт госпитальда емделеді.

Владимир Белозёров, соғыс ардагері:

- 1945 жылы 9 мамырда Жеңіс күнін Алтай өлкесіндегі Барнауыл қаласында қарсы алдым. Сол күні адамдар екі түрлі сезімде болды. Бірі майданнан оралмайтын туған-туыстарын жоқтап, ал екіншісі өздерінің тірі қалғанына, жақындарының аман екеніне қуанғандықтан, көзіне жас алды.

Соғыстан кейін Мәскеу индустриалды институтын тәмамдап, Алматыға оралды. 28 жыл бойы құрылыс материалдары комбинатында еңбек етті. Ардагер қыста қалада тұрады, көктем келісімен саяжайға барып, бақшасын баптайды. Жұбайы Тамарамен бірге қияр, қызанақ өсіреді.

Тамара Белова, Владимир Белозёровтың жұбайы:

- Біз өте сабырлы жандармыз, сол себепті көп ұрыспаймыз. Келіспей қалған кезде бір-бірімізге жол беріп, үндемей қалсақ, бәрі жақсы болады. Бұрын жас кезімізде бірге ән айтып жүретін едік.

Ардагер бос уақытында шахмат ойнайды. Оның айтуынша, шахмат адамның ойлау мен есте сақтау қабілетін шыңдайды. «Ұзақ өмір сүргіңіз келсе, денсаулықты жас кезден күту керек», – дейді ардагер.

Авторлары: Аршын Кемелжан, Валентин Лобанов