Түркия оппозициясы билікке қатысы бар деген сылтаумен бірқатар брендтерге бойкот жариялады және тауарларын тұтынбауға үндеді. Олардың ішінде кофехана, кітап, жиһаз, туризм компаниялары бар. Сондай-ақ елде алты күннен бері болып жатқан шеру жайлы ақпар таратпаған телеарналарды көрмеуге шақырды. Бұл туралы «Республикалық халық партиясының» жетекшісі Өзгүл Өзел мәлімдеді.

Түркияда Ыстамбұл мэрі ұсталғаннан кейін басталған ереуілдер әлі де жалғасып жатыр. Ішкі істер министрлігінің мәліметінше, қазірге дейін мыңнан астам адам ұсталып, полицияның 100 ден аса қызметкері жарақат алған. Ал кеше шеру кезінде Ердоған мен оның отбасына тіл тигізді деген айыппен 55 адам қамалды. Бұдан бөлек, Ыстамбұл, Анкара және Измирде сәуірдің 1-не дейін жиындар өткізуге тыйым салынды. Өз кезегінде ел президенті Режеп Тайип Ердоған арандатушылық әрекеттерді доғаруды талап етті.

Режеп Тайип Ердоған, Түркия президенті:

- Мен бұл үндеуімді бұған дейін де бірнеше рет айттым, бүгін де қайталап отырмын: арандатушылықпен азаматтарымыздың тыныштығын бұзуды доғарыңыздар. Батылдарыңыз жетсе, жемқорлық, ұрлық, пара алу деректері бойынша жауап беріңіздер.