Қазақтанда техногендік-минералдық түзілімдерді өңдеуге жеңілдетілген лицензия енгізілуі мүмкін, деп хабарлайды 24kz.

Өнеркәсіп және құрылыс министрлігі осы мәселені пысықтайды. Үкімет отырысында Экология және табиғи ресурстар министрі қалдықтар проблемасын шешуге арналған бірқатар ұсыныспен бөлісті. Қоқыс мәселесі қалай шешіледі?

Ғазиза Мұхамеджанова, тілші:

- Экология және табиғи ресурстар министрі Ерлан Нысанбаев елді мекендер маңында жинақталған техногендік-минералды түзілімдерге қатысты мәселені шешу жолдарын ұсынды. Соның ішінде қалдықтарды елді мекендерден тыс жерлерге әкетуге және қайта өңдеуге мүмкіндік беретін заңнамаға өзгерістер енгізу пысықталып жатқанын атап өтті. Мәселеле моноқалалар үшін өте маңызды.

Ерлан Нысанбаев, ҚР Экология және табиғи ресурстар министрі:

- Өңірлерде жобаларды жүзеге асыру және қайталама шикізатты максималды түрде алу кезінде тұрмыстық қалдықтардың келесі негізгі фракцияларын қайта өңдеу қуаттылығын арттыру үшін потенциал сақталады. Мысалы пластик бойынша қайта өңдеу потенциалы жылына шамамен 450 мың тоннаны құрайды. Мәселен, Шығыс Қазақстан, Ұлытау және Жетісу облыстарында пластикті қайта өңдейтін кәсіпорындар жоқ және тиісті жобалар ұсынылмады.

Бүгінгі Үкімет отырысында айтылған тағы бір мәселе – өнеркәсіп орындарынан шығатын қалдықтар. Жыл сайын Қазақстанда 1 миллиард тонна өнеркәсіптік қалдық түзіледі. Соңғы екі жылда елде экологиялық заңнаманы бұзғаны үшін кәсіпорындарға 14,3 млрд теңгеге айыппұл салынды. Бұл туралы Үкімет отырысында Экология және табиғи ресурстар министрі Ерлан Нысанбаев мәлімдеді. Олардың ішінде қалдықтарды қажетті экологиялық рұқсатсыз жинағаны үшін «Каспий Мұнай» АҚ-ға 13,7 млрд теңге айыппұл салынған. «Altyntau Kokshetau» АҚ және «Қаржы-инвестициялық корпорация» АҚ нормативтен тыс қалдықтарды жинағаны үшін жауапқа тартылды, олар 145 млн теңге және 108,7 млн теңгені айыппұл төледі. Қолданыстағы заңнамаға сәйкес әрбір кәсіпорын қалдықтарды басқару бағдарламасын әзірлеуге міндетті екенін атап өткен жөн.

Ерлан Нысанбаев, ҚР Экология және табиғи ресурстар министрі:

- Ағымдағы жылы қалдықтарды басқару бойынша бойынша 3 арнайы анықтамалық әзірленуде: «Қалдықтарды термиялық әдіспен жою және кәдеге жарату», «Қалдықтарды көму», «Қалдықтарды қалпына келтіру». Сонымен қатар министрлік жүргізген талдау, жүйелі мәселелердің әлі де бар екенін айқындады.

Жалпы Экология министрлігі қалдықтарды басқаруды жетілдіру үшін заңнаманы қайта қарауды, бірыңғай үйлестіру механизмін әзірлеуді және қалдықтарды өңдеуді экономикалық тұрғыдан ынталандыру шараларын іске асыруды ұсынады.

Авторлары: Ғазиза Мұхамеджанова, Арман Ақшабаев