АҚШ астанасында әйгілі сакура фестивалі өтіп жатыр.

Әдетте шие ағаштарының бүршік жару кезін мыңдаған турист арнайы келіп тамашалайды.

Жапонияның символына айналған әсем көрініске 113 жыл толып отыр.

Ердана Ержанұлы, тілші:

- Күн мен түн теңеліп, табиғат ана оянып, Самарқанның көк тасы еріген кезде дәл осы сакура ағаштары жер-жаһанда гүлдей бастайды. Жапониядан кейінгі ең танымал орын Вашингтон қаласы.

Тарихы сонау 1912 жылы Токио мэрінің сыйлығынан бастау алатын игі дәстүр Күншығыс елі мен АҚШ достығының символы болып келеді. Тура 113 жыл бұрын Юкио Озаки тарту еткен 3 мың түп шие ағашы бүгінгі күні түгел шаһардың сәніне айналған. Жыл сайын 1.5 млн туристің келуіне себеп болатын көркем сәт биыл да ерекше ауқымда аталып өтті.

Тэйлор Суинтер, турист:

- Шие ағаштары гүлдеген сәт көктемнің ресми түрде басталғанын білдіреді. Биыл қыста Вашингтонда күн өте суық болды. Сакураның гүлдеріне қарап жылы жаздың келе жатқанынан хабар алып отырмыз. Жаз келе жатыр деп қуанып жатырмыз.

Хэзер Норвайас, турист:

- Биыл бақтағы шие ағаштары ерекше гүлдеп тұр. Балаларымды арнайы алып келіп, көрсетіп жүрмін.

Шаолин Трибл, қала студенті:

- Бүгінгі фестивальге қытай халқының ұлттық киімін арнайы киіп келдім. Осында университетте оқимын. Жыл сайын табиғаттың осы бір керемет құбылысын келіп тамашалауды әдетке айналдырғанмын.

2024 жылы дәл осы шие ағаштарын көрем деп келген қала қонақтары Вашингтон бюджетіне 200 млн АҚШ доллары көлемінде кіріс алып келген. Жыл сайын бірнеше апта бойы түрлі концерттер, батпырауықтар фестивалі, шерулер мен түрлі іс-шаралар өтеді. Нәзіктік пен сұлулықтың символы болған сакура осылайша көктемнің мамыражай күндері басталғанынан хабар беріп, көпшілік көңіліне медеу болады.

Ердана Ержанұлы