Елордада Инклюзивті спорт орталығының құрылысы басталды, деп хабарлайды 24KZ. Қазақстан бочча федерациясының президенті, Сенат төрағасы Мәулен Әшімбаев құрылыс барысымен танысып, спорт орталығының іргетасын қалау рәсіміне қатысты.

Жаңа Инклюзивті спорт орталығында мүгедектігі бар спортшылардың алаңсыз жаттығуына жағдай жасалады. Онда бочча, баскетбол, арбамен ойнайтын футбол, голбол, отырып ойнайтын волейбол сынды спорт түрлеріне арналған залдар болады. Мәулен Әшімбаев елордада аталған спорт орталығын салу әділетті мемлекет құру жолындағы маңызды қадам екенін атап өтті.

Мәулен Әшімбаев, ҚР Парламенті Сенатының төрағасы:

- Президентіміз Қасым-Жомарт Кемелұлы Тоқаев әрбір азаматтың дамуына және өз әлеуетін жүзеге асыруына жағдай жасалған әділетті қоғам құрудың маңызды екенін үнемі айтып келеді. Инклюзивті қоғам дегеніміз – әрбір Қазақстан азаматы үшін тең мүмкіндіктерді қалыптастыру. Әрбір азамат үшін өзінің әлеуетін жүзеге асыруға барлық керекті мүмкіндіктерді қалыптастыру екені сөзсіз. Осы бағытта елімізде көптеген жұмыс атқарылып жатыр. Осы жұмыс аясында бүгін, міне, алғашқы орталықтың іргетасын қалап жатырмыз.