Риддерлік Гребенщиковтер отбасы әлемнің ондаған мемлекетін велосипедпен аралап шықты.

Монғолия мен Үндістаннан басталған сапар біртіндеп шөл дала мен таулы өлкелерде жалғасты. Сондай сапардың бірінде олар шытырман оқиғаларға да тап болған.

Гребенщиковтер әр сапарына тыңғылықты дайындалады. Баратын мемлекеттің жер бедерін бағамдап, сол бойынша жаттығу әдетке айналған. Спорт пен саяхатты үйлестіре білген жиһанкез отбасы осыған дейін Еуропа мен Азияның көптеген мемлекетін аралап шыққан.

Виталий Гребенщиков, веложиһанкез:

- Велосипедпен жүру біріншіден денсаулыққа пайдалы. Екіншіден, өзге елдерді аралау арқылы ондағы адамдардың спорттық жетістіктерімен, мәдениетімен танысамыз.

Виталийдің отбасы велоспортпен 2007 жылдан бері шұғылданады. Бүгінге дейін ол жары Жанна және ұлы Иванмен бірге Грузияның таулы шыңдарын, монғол даласы мен Қытайдың қырат белдерін бағындырды. «Сапар кезінде кейде оқыс оқиғалар да болып тұрады» дейді жиһанкез. Мысалы, қырғыз еліне барғанда олардың велосипедін ұрлап кеткен.

Виталий Гребенщиков, веложиһанкез:

- Келіншегім Жанна екеуміз ең алғаш рет 2007 жылы тауда жүруге арналған велосипед сатып алдық. Ол кезде саяхаттан ешқандай тәжірибеміз де жоқ еді. Алғашқы сапарымызға ешқандай дайындықсыз шығып кетіппіз. Дегенмен, біртіндеп үйреніп кеттік.

Ата-анасының жолын ұлдары Иван да лайықты жалғап келеді. Оның жетістігі кәсіби спортшылардан кем емес. Жасөспірімдер арасында республикалық жарыста үш мәрте топ жарған.

Иван Гребенщиков, веложиһанкез:

- Жаттығу жасаудан жалыққан емеспін. Жеңісті жолымды әлі де жалғастыра беремін деп ойлаймын. Қазір мен мотоспорттан спорт шеберлігіне үміткермін. Осы жетістігімді велоспорт бойынша да қайталағым келеді.

Ал Жанна үшін велосапарға шығу отбасымен уақытты көңілді өткізудің ең тиімді жолы. Қиындық пен қызыққа толы мұндай саяхаттар отбасындағы бірлікті арттырады дейді ол.

Жанна Гребенщикова, веложиһанкез:

- Демалыс күндерін үнемі отбасымызбен бірге өткізуге тырысамыз. Жаз бойы велосипедпен түрлі елдерді араласақ, қысқы уақытта тауға шығып шаңғы тебеміз.

Виталий өндірісте еңбек етеді. Жанна заңгер, ал Иван спортшы. Отбасындағы өзара түсіністік түрлі мамандық иелерін бір мақсатқа тоғыстырған. Олар алдағы уақытта алыс шетелге сапарға шығуды жоспарлап отыр.

Елдос Кәкенов, Вячеслав Ветлугин және Дмитрий Пыхтин