Қарағанды қаласында 8 жастағы мүмкіндігі шектеулі балаға мерзімі өтіп кеткен дәрілік препарат берілгені белгілі болды. Бұл туралы баланың анасы мәлімдеп, сотқа жүгінуге ниетті екенін айтқан, деп хабарлайды Egemen.kz.

Анасының айтуынша, баласы сирек кездесетін ми ауруы мен эпилепсиядан зардап шегеді. Соңғы бір жарым жыл бойы ремиссияда болғанымен, 2025 жылдың мамыр айында тағы да ұстама қайталанған. Осыдан кейін анасы баласына берілген «Депакин» сиропының жарамдылық мерзімі өтіп кеткенін анықтаған.

Облыстық денсаулық сақтау басқармасының мәліметінше, препарат 2024 жылдың 31 желтоқсанында берілген. Олардың айтуынша, анасына 1414 қызметі арқылы хабар берілген, сондай-ақ бірнеше рет телефон арқылы байланысуға әрекет жасалған.

«Анасы бұл препаратты сол кезде алмаған, себебі бұған дейін берілген дәрі жеткілікті болған. Ол тек 2025 жылғы 23 мамырда келіп, дәріні алған. Сол кезде медбике жарамдылық мерзіміне мән бермей қалған», делінген ресми түсініктемеде.

Баланы тәрбиелеп отырған ана бұл мәлімдемемен мүлде келіспейтінін айтқан.

«Көше бойында көршілес үйде тұрып жатқан адамды таппадық дегенге кім сенеді? Баламның денсаулығы үшін күн-түн үйде отырамын, дәріні алмауым мүмкін емес. Бұл жүйеге деген сенімнің бұзылуы. Егер дәрі берілсе, ол қолдануға жарамды болуы тиіс», деді ол.

Облыстық денсаулық сақтау басқармасы қызметтік тексеру басталғанын хабарлады. Учаскелік медбике жұмыстан уақытша шеттетілген. Дисциплинарлық кеңес отырысы оның қызметке сәйкестігін анықтайтын болады.

Ведомство өкілдері қазіргі уақытта бала толық көлемде қажетті дәрімен қамтамасыз етілгенін атап өтті.

Айта кетейік, Қазақстанда қазіргі уақытта дәрі-дәрмек бағасын реттеудің жаңа ережелері енгізіліп жатыр.