Елордада екі күн қатарынан қазақ күресінен балалар арасында Қазақстан чемпионаты өтеді, деп хабарлайды 24KZ. Бұндай жарыс алғаш рет ұйымдастырылып отыр. Дода Астана күніне орайластырылған. Барлық өңірден 11-12 жастағы 300-ге жуық балуан қатысады. 12 салмақ дәрежесі бойынша белдеседі. Осылайша болашақ дарынды спортшы анықталмақ. Ал жалпы қазақ күресін халықаралық деңгейге көтеріп, Азия ойындарының қатарына кіргізу көзделген.

Дамир Бекбосынов, Qazaq Kuresi ассоциациясының бас директоры:

- Ең кішкентай жас санаты. Алғаш қосып отырғаннан кейін әр өңірден бір-бір спортшыдан 1 салмақ дәрежесінде күресуге рұқсат беріп отырмыз. Бұл не үшін? Жарақат алу профилактикасы деп есептеймін. Ең мықты, лайықты, дайын бір бала өңірден келіп, күресіп қайтса, оның өзі жарыстың жақсы деңгейін көрсетеді деген ойдамыз.