Бразилия билігі Амазония ормандарының ағашын кесуге қарсы күресті күшейтті , деп хабарлайды 24kz.

Биыл осы елдегі Қоршаған ортаны қорғау институтының қызметкерлері жүйелі түрде тексеріс жүргізуді қолға алған. Осының арқасында ағаш бұтау бойынша ондаған заңсыз зауыт анықталып, жұмысы тоқтатылды.

Ернат Рахметолла, тілші:

- Қоршаған ортаны қорғау институтының қызметкерлері тексерісті күн құрғатпай жасайтын болды. Олардың басты міндеті – ағаш өңдейтін кәсіпорындарды әшкерелеу.

Бұл тексерістер Амазония тропикалық ормандарын қалпына келтіруге арналған ауқымды жобаның бір бөлігі. Амазония ағаштарын ғалымдар «Жер шарының өкпесі» деп атайды. Кейінгі 1,5 айдың ішінде ондаған ағаш кесетін кәсіпорын жабылып, 5 мыңнан астам жүк көлігіне тиелген ағаш тәркіленді. Заң бұзған ұйымдарға 2 миллион 700 мың доллар көлемінде айыппұл салынған.

Хаир Шмитт, Бразилияның Қоршаған ортаны қорғау институтының департамент директоры:

- Мұндай тексерістер өте қажет. Осы операциялар арқылы қаншама қылмыстың бетін ашып, жолын кесіп жатырмыз. Заңсыз пайдаланылған бұл алаңдардың көбіне кейін мал шаруашығы қожалықтары салынған. Мұның бәрі топырақты тоздырып, экологиялық апатқа әкеледі.

Аймақта орман ағаштарын көп жағдайда жайылымдарды кеңейту, ауыл шаруашылығы алқабына айналдыру және тұқымы сирек өсімдіктерді саудалау үшін кеседі. Бұрынғы президент Жаир Болсонару кезінде орманды рұқсатсыз отау қарқыны өсіп, қазір бәсеңдей бастаған. «Былтыр бұл көрсеткіш 36%-ке төмендеді», - дейді сарапшылар. Бұған мемлекеттің қатаң саясаты себеп.

Хаир Шмитт, Бразилияның Қоршаған ортаны қорғау институтының департамент директоры:

- Бізде бірнеше топ бар. Олар әртүрлі бағытта жұмыс істейді. Осылайша, біз ағаш кесетіндерді бөлек, заңсыз өнімді сататындарды бөлек әшкерелейміз. Тіпті бұлар шетелдік сыбайластармен астыртын байланыс орнатып, халықаралық желі құрып алған. Біздің ағаштар Еуропа, Қытай, АҚШ пен Жапонияда жоғары бағаланады.

Амазония ормандары ауаға таралатын оттегінің 40%-ін өндіреді және тұшы су қорында маңызды рөл атқарады. Бұл аймақта басқа жерде кездеспейтін өсімдіктер мен жануарлар бар.

Авторлары: Ернат Рахметолла, Әсел Әбдіхалықова