Арқалықтағы Ыбырай Алтынсарин атындағы педагогикалық институтқа университет мәртебесі берілетін болды, деп хабарлайды 24KZ. Қазір тиісті қаулы дайын. Осыған орай білім ордасында ауқымды жұмыстар атқарылады. Бұл мәселе былтыр өткен Ұлттық құрылтайда көтерілген еді.

Биылғы құрылтай алды секциялардың отырысында да білім беру саласы назардан тыс қалмады. «Білім және Ғылым» секциясында отандық ғалымдар ғылыми кадрларды дайындаудың жаңа ережесі керектігін айтты. Сонымен қатар алқалы жиында саланы цифрландыру, жасанды интеллектіні қолдану, кітапханашылардың мәртебесін көтеру сияқты бірақатар мәселе талқыланды.

Жұлдыз Сүлейменова, Ұлттық құрылтай мүшесі:

- Университет статусы бұл сол жерде жұмыс жасайтын профессор, оқытушы құрамның жалақысына, жалпы оның әлеуметтік кепілдемелеріне оң әсерін тигізеді. Сонымен қатар институттың бітірген дипломы мен университеттің бітірген дипломның халықаралық деңгейде болсын, республикалық деңгейде болсын, мойындалуы екі түрлі. Соған байланысты біз осындай ұсынысты айтқанбыз. Бүгін бізге секция модераторы, Ғылым және жоғары білім министрі бізге сүйінші хабарды жеткізді.