Салық реформасы, бірыңғай уақыт белдеуі және елдегі діни ахуал.

Бурабайдағы Ұлттық Құрылтайда Президент халық көкейіндегі өзекті мәселелерді көтеріп, талас-тартысы көп тақырыптардың нүктесін қойды. Отырыста құрылтай мүшелерінен де көптеген ұсыныс түсіп, оның бірқатары Президент қолдауын тапты.

Бекзат Аманов, тілші:

- Ұлттық құрылтай — дала демократиясын түлетіп ғана қоймай, жаңару мен жаңғырудың символына айналды. Келелі кеңес жылда амал мерекесінде ұйымдастырылып жүр. Ұлыстың ұлы күні табиғат пен тұтас тіршілік жаңарса, құрылтай қоғамдық құндылықтарды жаңғыртады. Сол үшін Бурабайдағы биылғы басқосуда әлеуметтік-экономика ғана емес, идеологияға да екпін берілді. Президент, алдымен салық реформасына тоқталды. Ел қазынасына түскен әр тиын әлеуметтік бағытқа бөлінетінін еске салды. Демек, салық та халыққа жұмсалады. Бірақ осыған қарамастан заңды айналып өтетіндер жетерлік.

Қасым-Жомарт Тоқаев, Қазақстан Республикасының Президенті:

Қазақстанда түрлі салық режимі, көптеген жеңілдіктер мен преференциялар бар. Оның бәрі елімізде салық офшоры сияқты ахуал қалыптастырды. Кәсіпкерлердің екі негізгі тобы пайда болды. Олар заңнамадағы олқылықтарды пайдаланып, салық салынатын табысын өзі үшін азайтып көрсететіндер және барлық салықты адал төлейтіндер. Кәсіпкерлердің осы екінші тобы бәсекеге төтеп бере алмай жатыр. Үкімет салық төлеуден жалтару үшін бизнесін бөлшектейтіндердің әрекетіне орынды назар аударды. Өкінішке орай, мұндай жағдай жаппай белең алған.

Президент әдемі көрсеткішке әуестеніп кеткенімізді айтты. Елде екі млннан астам салық төлеуші кәсіпкер тіркелген. Бірақ олардың жұмысына еш талдау жасалмаған. Осыған байланысты Қасым-Жомарт Тоқаев Үкімет пен Парламентке заңнамаға жедел түзету енгізу керегін жеткізді. Батыл шаралар қажет екенін жеткізді. Бұл бастаманы Ұлттық құрылтай мүшелері қолдап отыр. Олардың айтуынша, салықтың аясы қосымша құн салығынан әлдеқайда асып кетеді. Егжей-тегжейлі талдауды қажет етеді.

Расул Рысмамбетов, Ұлттық құрылтай мүшесі:

- Алда үлкен жұмыс күтіп тұр. Салық жүйесінің аясы өте кең. Салық дегеніміз байлықты бөлу. Яғни байлардан алып, қаржы таба алмайтындарға бөліп береміз. Мен балалар, зейнеткерлер және мүмкіндігі шектеулі жандар туралы айтып отырмын. Демек, салық арқылы ресурстарды әділ бөле аламыз. Сол үшін оның маңызы жоғары.

Қ. Тоқаев: Уақыт белдеуіне қатысты пікірталасты доғару қажет

Келелі кеңесте айтылған маңызды мәлімдемелердің бірі – біріңғай уақыт белдеуіне қатысты. Бұл мәселе бойынша арнайы зерттеу жүргізіліп, қоғам белсенділерінің күмән-күдігі расталмады. Демек, бұл зияны жоқ, ал пайдасы көп шешім болды дейді биліктегілер. Сол үшін Президент бұл сұрақтың нүктесін қоюға шақырды.

Қасым-Жомарт Тоқаев, Қазақстан Республикасының Президенті:

- Бұл тәсіл мемлекетті басқару ісін жеңілдетеді, логистика мен көптеген бизнес-үдерісті оңтайландыруға септігін тигізеді. Осымен пікірталасты доғару қажет деп ойлаймын, оның үстіне бұл мәселені саясиландырудың қажеті жоқ.

Құрылтайда идеологиялық мәселелерге де екпін берілді

Дінімізде де дүмшелер көбейіп барады. Құрылтай мүшелері осылай деп, ахуалға алаңдаушылық білдірді. Жат ағымдар жастар мен спорт саласында ықпалы күшейген. Президент те бұл пікірмен келіседі. Ол «қазақтың болмысына жат идеологияларға тосқауыл қою қажет екеніне еш күмән жоқ» деді. Тиісінше бұл мәселеге зер салудың маңыздылығына тоқталды. Құрылтай мүшесі Айман Омарованың хатынан кейін Президент әйелдер колониясындағы жағдайға да назар аударды.

Айман Омарова, Ұлттық құрылтай мүшесі:

Қоғам ішінде идеология ақсап тұр деген пікір жиі айталады. Бағыт болмаған соң халық адасып жүр. Түрлі алаяқтарға алданып, жалған психологтар мен коучтардың тұзағына түсу жиілеген. Ақыры бұл түйткіл Президентке де жетті. Мемлекет басшысы жауапты органдарға тиісті тапсырма берді. Одан бөлек, Қазақстан балалары атты біртұтас бағдарлама әзірлеуді тапсырды. Ол Білімге ғана емес ұрпақ тәрбиесіне екпін беру керек. Оған қоса сан саланы қамтитын көптеген ұсыныс пен міндеттер жүктелді. Жұмыстың мерзімі де белгіленді. Президент бақылау қатаң болатынын тағы бір еске салды. Оның сөзі арқаны кеңге салатын уақыт өтті дегенге саяды.

Бекзат Аманов, Ержан Қанапияұлы