Биыл «Мемлекеттік қызмет туралы» жаңа заң қабылдануы тиіс. Қазір оның жобасы дайындалып жатыр. Бұл туралы Мәжіліс депутаттарымен өткен жиында Мемлекеттік қызмет істері агенттігінің төрағасы Дархан Жазықбаев мәлімдеді. Тараптар саладағы жетістіктер мен перспективаларды талқылады.

Қағазбастылықты болдырмау – ауқымды істердің жүйелі бастамасы. Қазір Мемлекеттік қызмет істері саласында бюрократиядан арылу мен жемқорлықты жою мақсатында цифрлық форматқа ден қойылып отыр. Мәселен, былтыр автоматтандырылған «eQyzmet» жүйесі 68 мемлекеттік органда іске қосылды. Биыл ол тағы 26 мекемеге енгізілді. Ал жыл соңына дейін барлық өңірді қамту жоспарланған. Бұдан бөлек, қазір салада тиімді аппаратты қалыптастыруға да мән беріліп отыр.

Дархан Жазықбай, ҚР Мемлекеттік қызмет істері агенттігінің төрағасы:

- Қазіргі таңда бюрократиядан арылту бойынша талдау жұмыстарын жүргізіп жатырмыз. Осыған байланысты Үкіметке 900-ге жуық ұсыныс бердік. Оның ішіндегі негізгі 300 ұсынсты, тиімді аппаратты қалыптастыру, проактивті және цифрлық қызмет көрсетуге өтуге болатын ұсыныстарды беріп жатырмыз. Міне, осының барлығы – мемлекеттік аппараттың тиімді жұмыс істеуіне қалыптастыру бойынша жүргізіліп жатқан жұмыстар.

Мемлекеттік қызметке іріктеу жүйесінде де оң өзгеріс бар. Мәселен, 2023 жылдан бері бұл процесс онлайн режимде жүзеге асып келеді. Алайда тек пилоттық жоба ретінде. Ал енді келер жылдан бастап бұл процесс толығымен ресми түрде қолданысқа енгізіледі.

Дархан Жазықбай, ҚР Мемлекеттік қызмет істері агенттігінің төрағасы:

- Яғни конкурстардың бәрі онлайн өтеді. Бұл жерде біз осы уақытқа дейін 1 жылдың ішінде 12 мың конкурс жарияладық. Оның ішінде 44 мың адам қатысты. Оның ішінде 5 мыңнан аса мемлекеттік қызметке адамдар орналасты осы жүйе бойынша. Сондықтан бұның да өз көрсеткіші бар. Себебі бұрынғы конкурстармен қарайтын болсақ, бұрын 1,7 адам қатысатын болса, яғни 3,6, 4 адамға дейін бір орынға қатысады.

Бүгінде Мемлекеттік қызметті дамытудың 2029 жылға дейінгі тұжырымдамасы іске асып келеді. Ал оның кедергісіз әрі сәтті жүзеге асуы үшін жаңадан тиісті заң жобасы әзірленіп жатыр. Мамандардың айтуынша, бұл құжат жыл соңына дейін Мәжіліс депутаттарының қарауына жіберіледі.

Марат Бәшімов, ҚР Парламенті Мәжілісінің депутаты:

- Осы заңда маңызды принцип бар: халық үшін, қоғам үшін жұмыс істеу. Кімге қай салада көңіл бөлу керек деген мәселелер бәрі заңда бар. Бізге ол заң келеді. Яғни мемлекеттік қызметтің өз сапасы жоғарыға көтеріледі. Сол үшін осы заңның келе жатқанын күтіп отырмыз.

Иә, осылайша мемлекеттік қызмет істері саласы жан-жақты дамып келеді. Ал бұл құжат оған тек оң үлес қосады. Себебі жаңа заң қоғам мен мемлекеттік қызметшінің арасындағы өзара байланысты нығайтып, жұмыскерлердің еңбек қатынастарын реттеуге бағытталып отыр.

Авторлары: Альмира Оразбай, Ғалымжан Абдылахат