Түркияда Ыстамбұл мэрі Экрем Имамоғлұ ұсталды, деп хабарлайды 24KZ. Республикалық халық партиясынан сайланған саясаткер алдағы саяси додада президенттікке оппозиция атынан жалғыз үміткер болатын.

Экрем Имамоғлұ оппозициялық Республикалық халық партиясының жетекшілерінің бірі. Ердоғанның басты қарсыласы ретінде танымал. Өзінің ұсталуын ол «қорлаушы әрекет» деп атап, «күресті жалғастыратынын» мәлімдеді.

Экрем Имамоғлұ, Ыстамбұл мэрі:

- Үлкен озбырлықпен бетпе-бет келіп отырмыз. Бірақ менің қорықпайтынымды білгендеріңізді қалаймын. Ұлтыма арқа сүйеймін. Менің қаймықпай тік тұратынымды бүкіл халқым білсін.

Ыстамбұл мэрімен бірге 100-ден астам адам ұсталды. Имамоғлұна жемқорлық, қылмыстық ұйым құру және Түркияда террорлық ұйым деп танылған «Күрдістан жұмысшы партиясымен» байланыста болды деген айып тағылып отыр. Бұл айыптар құқық қорғау органдарының араласуына негіз болды. Алайда Имамоғлұ мен оның жақтастары бұл оқиғалардың саяси астары бар екенін айтып отыр. Бұған елдің әділет министрі көп кешікпей жауап қатты.

Йылмаз Тунч, Түркияның әділет министрі:

- Қылмыстық процестік кодекстің 157-бабы бойынша тергеу кезеңі құпия болып табылады. Бұл құпиялық, бір жағынан, әділеттік орнату, екінші жағынан, құқық бұзушылықтарды болдырмау, кінәсіздік презумпциясы тұрғысынан өте маңызды. Басталған тергеулер бойынша іс мазмұнына, айыптар мен дәлелдерге таныспай жатып баға беру дұрыс емес. Тәуелсіз соттың жүргізіп жатқан тергеулерін басқа тараптармен байланыстыру, төңкеріс сияқты сөздермен сипаттау өте қауіпті және қате.

Түркияның басты оппозициясының жетекшісі Ыстамбұл мэрінің ұсталуына байланысты халықты наразылық шеруіне шақырды. Дәл қазір бірқатар қалада ереуілдер өтіп жатыр. Ал Ыстамбұл губернаторлығы 23 наурызға дейін мегаполисте кез келген шеру мен баспасөз мәслихаттарын өткізуге тыйым салды. Осы жағдайдан соң доллардың түрік лирасына қатысты бағамы 11% қымбаттады.

Айта кеткен жөн, кеше Түркияның бас прокуратурасының сұрауы бойынша Имамоғлұның «Бизнесті басқару» мамандығы бойынша Ыстамбұл университетінен алған дипломы жарамсыз деп танылды. Бұл оның президенттікке үміткер болуына кедергі болары анық. Өйткені елдің конституциясына сәйкес жоғары білімі бар азаматтар ғана президенттікке кандидат бола алады.

Авторы: Меруерт Қанағат