Берлинде Наурыз мейрамы тойланды.

Мерекелік іс-шараны жергілікті биліктің қолдауымен «Cultur Kooperation International» ұйымы ұйымдастырды. Игі бастаманы Қазақстан, Өзбекстан, Қырғызстан, Ауғанстан, Иран, Тәжікстан және Ирак елшіліктері қолдады.

Ұлыстың ұлы күні – көшпенді халық үшін ортақ мереке. Сондықтан 7 елдің қай-қайсысы болсын, ұлық мерекені асыға күтеді. Бүгінгі іс-шарада өзбектер палауын, тәжіктер қыш ыдыстарын, қырғыздар орамалын арқалап келсе, қазақтар киіз үйдің шағын үлгісін алып келді. Барша жұрт көшпенділердің ұлттық мұрасын танып біліп, Наурызға арнап жайылған дастарханнан дәм тәтті.

Блиц

- Өмірімде құрттың дәмін алғаш рет татып көрдім. Ащы, әрі сәл қышқыл болғанымен, маған ұнады. Қазақстанда болған емеспін, барсам ба деген ойым бар.

- Әзербайжан халқында да құрт жасайды. Бірақ бізде үлкенірек етіп жаяды. Екі елдің өмір сүру салтында ұқсастық көп. Мен бауырлас қазақ халқын Наурыз мерекесімен шын жүректен құттықтаймын.

Сондай-ақ Берлин төрінде ұлттық дәстүрлері көрсетіліп, әр елдің халық әндері шырқалды. Қазақстанның Атырау қаласынан «Сармат» фольклорлық ансамблі концерт қойды. Олардың өнері жиылған жұрттың ыстық ықыласына бөленді. Домбыра, қылқобыз және жетігеннің үні баршаның көңілін ерекше баурап алды.

- Қазақстаннан келген фольклорлық ансамбльдің өнеріне ерекше тәнті болдым. Бізге нағыз көктемгі көңіл-күй сыйлады.

- Бүгін өзге елдердің мәдениеті мен салт-дәстүрін танып, білдік. Қазақи аспаптардың үнін тыңдап, ерекше әсер алып қайтып барамыз. Қазақстанға қатысты жақсы естеліктерім көп.

Германия астанасындағы Наурыз халықтар достығының нышаны іспетті. Жиылған жұрт Берлинде Ұлыстың ұлы күнін тойлау келесі жылы да жалғасын тапса деген ниет-тілектерін білдірді.

Зайнұр Байжігіт, Шолпан Найманбаева