Елдің автокөлік жолдарына әлемнің бірқатар мемлекетінде сыналған жасанды интеллект жобасы енгізіледі.

«Smart city» тұжырымдамасына негізделген жүйе әуелі Астанада қолданылмақ. Оның игілігін осы күні Араб әмірліктері сезініп отыр. Әбу Даби және Дубай секілді қалалар қауіпсіздікке келгенде, бастан аяқ бейнебақылау камераларына сүйенген. Онысы тек көшедегі қозғалысты ғана емес, кептелісті реттеп, қылмыстың алдын алуға көмектеседі.

Рауан Мыңбай, тілші:

- Дубайдың ақылы автокөлік жолдарында қозғалыс күн-түні үзілмейді. Әр шақырым сайын ақылды камералар орнатылған. Бір көліктен кемі 6 дирхам, теңгеге шаққанда 800 теңге төлем алынады. Бұл қондырғылар тек жол ережесін бақылап қана қоймай, шаһардың цифрлық көшірмесі қызметін атқарады. Полиция органдарының қырағы көзіне айналған.

Анығында бизнес нысандар және тұрғын үй аулалары да ақылды жүйемен қамтылып отыр. Қала бойынша 14 полиция учаскесі болса, соның барлығы бейнебақылау жүйесіне арналған ситуациялық орталықпен жұмыс істейді.

Омар Мусалим, Дубай полициясы департаментінің сержанты:

- Әмірліктерде 220-дан астам ұлт өкілі тұрады. Түрлі мәдениет топтасқан. Жан-жақты келетін азаматтар үшін қолайлы әрі қауіпсіз орта қалыптасқан. Біз қолданатын бейнебақылау камераларының саны өте көп. Оның орналасқан жері нақты айтылмайды. Бірақ Дубайдағы барлық полиция учаскесінде өздері бақылайтын аумақтың цифрлық көшірмесі жасалған. Біз мұны «Дубай полициясының қырағы көзі» деп атаймыз.

Жүйе жасанды интеллектке негізделген. Оның көшедегі кептелісті реттеуге тікелей әсері бар. Бағдаршамдар «Smart city» жобасына сай жасалған. Жүргізушілер жол бойында сағаттап тұрмайды. Жергілікті билік жан-жақты сынақтан өткен жобаны қаланың өзге де бөліктеріне енгізуді жоспарлап отыр.

Рауан Мыңбай