Арқалықта 30-ға жуық ғимарат қараусыз, қаңырап тұр.

Әкімдік жекенің иелігіндегі нысандарды коммуналдық меншікке қайтарып, ел игілігіне жаратудың амалын қарастырып жатыр. Тозығы жеткен үш ғимарат биыл жөнделеді.

Есік, терезесі үңірейіп, қала сәніне нұқсан келтірген мынау ғимарат 1960 жылы салынған. Кезінде мұнда облыстық ауыл шаруашылығы басқармасы болды. Кейін жеке меншікке сатылып, қолдан-қолға өтіп, бірнеше адам иелік еткенімен ешкім пайдаға жаратқан жоқ. Былтыр облыстан арнайы трансферт бөлініп, нысан мемлекет меншігіне қайтарылды. Енді ол жергілікті университетке беріледі. Ал мынау бес қабатты ғимараттың қаңырап бос тұрғанына отыз жылдан асты. Биыл нысан толық жаңартылады, дейді жергілікті әкімдік өкілдері.

Айтжан Мәліков, қалалық дене шынықтыру және спорт бөлімінің басшысы:

- Бұл жерде жоспар бойынша дарынды балаларға арналған спорт интернатын салу. Бес қабатты ғимаратты жеке меншік иесінен әкімшілік балансына сатып алынып, міне бүгінгі күні сметалық құжаттама әзірленіп, бұл спорт интернаттың жатын корпусы болады. Ал артқы жағымдағы бос учаскеде осы спорт интернатының күреске және боксқа арналған залы болады.

Қазақстан кинотеатрының бұрыңғы ғимараты да спорт кешені ретінде қайта жаңғыртылады. Оның да өзіндік себебі бар. Арқалықта спорт нысаны жетіспейді. Жергілікті тұрғындардың 45 проценті, нақты айтсақ, 17 мың адам спортпен тұрақты айналысады.

Айтжан Мәліков, қалалық дене шынықтыру және спорт бөлімінің басшысы:

- Көптеген жекеменшік спорт секциялары ашылды. Қазір жастар ММБ дейді, панкратион, самбо деген сияқты спорт түрлерімен көптеп айналысуда. Барлықтары қазір жекеменшік ғимараттардың подвалында, жертөлелерінде дайындалып жатыр. Осылардың барлығын бір жерге шоғырландырып, спорт орталықтарын ашу ғой мақсат.

Жобалық-сметалық құжатқа сүйенсек, осы үш ғимаратты қалпына келтіруге 3 миллиард 500 миллион тенге қажет. Әзірге бұл соманың жартысы бөлінген.

Асылбек Шоқақов, қалалық құрылыс, сәулет және қала құрылысы бөлімі басшысының міндетін атқарушы:

- Спорт интернатының мердігері анықталды. Қазақстан кинотеатрын келесі жылға белгілеп отырмыз. Өйткені оның финансированиесі жартылай ғана берілді. Барлығы берлісе, осы жылға қабылдауға күш саламыз. Ал бұрынғы ауылшаруашылық ғимараты оған әлі қаражат бөлінген жоқ.

Спорт интернаты жыл аяғына дейін тапсырылады. Ал ауылшаруашылық басқармасы мен кинотеатрдың бұрыңғы ғимаратын жөндеу жұмыстарының қашан аяқталатыны белгісіз.

Мағауия Қалиев, Сергей Трахтенберг