Түркістан облысында 372 мың гектар аумақта шегірткеге қарсы химиялық өңдеу жүргізіледі, деп хабарлайды 24KZ. Мамандар оңтүстікте зиянкестердің ерте оянатынын айтады. Сондықтан жұмысшы топ шегірткенің ошағы бар аудандарды аралап, дайындықты пысықтады. Облыс бойынша 4 штаб құрылды. Былтыр бірнеше ауданда шегіртке қаптап, шаруалар шығынға батқан еді.

Түркістан облысының 9 ауданында шегірткенің ошағы бар. Әсіресе Сарыағаш, Келес, Шардара, Ордабасы, Қазығұрт және Арыс қаласының аумағында жиі кездеседі. Жұмысшы топ Арыс қаласы Қожатоғай ауыл аумағындағы жедел штабта болып, зиянкестерге қарсы күрес жұмыстарын пысықтады. Жайылым жерлердің картасы әзірленіп, 65 аумақта жұмыс күші жасақталды. Химиялық өңдеу жүргізетін техникалардың жай-күйімен танысты.

Нұрбол Бекмұратов, облыстық аумақтық инспекция басшысы:

- 209 су көздері, 45 водовоз, 40 жанармай таситын автокөліктер және облыстық Төтенше жағдайлар депаратментінен қосымша су таситын 20 автокөлік ұйымдастырылып отыр. Қазір біздің жоспарымыз бойынша көктемгі зерттеу жұмыстары басталды.

Былтыр дәрілеу, өңдеу жұмыстары жүргізілгенімен зиянкестер егіс алқаптарын отап кеткен еді. Биыл жауаптылар ерте қамданып жатыр. Әр жұмысшы топқа 5 техника мен 325 бүрку құралдары берілген. Залалсыздандыру шараларына екі мыңнан аса адам тартылады деп күтіліп отыр. Әр ауданға облыстық басқармалар мен мекеме басшылары жауапты болып бекітілді.

Нұрбол Тұрашбеков, облыс әкімінің орынбасары:

- Нақты кім қандай жұмыстар атқарады, қандай техникалармен жұмыс жүргіземіз? Бүгін осы бағытта дайындық жұмыстарын пысықтадық. Алдағы сәуір айының басынан өңдеу шараларына толық кірісеміз деген жоспармыз бар. Былтыр бізде 400 мыңнан астам гектарды алып жатқан болса, биыл да болжам орталығы сол жобада болады деп күтіліп отыр.

Шегірткенің дернәсілдері шоғырланған жерлерді анықтап, химиялық өңдеу жүргізіп, кейін алқапты тазалау жұмыстарының жоспары жасалды. Жергілікті әкімдіктер 980 анықтаушының тізімін бекітті. «Болжам әдістемелік орталығы» оларға жұмыс істеу тәртібін үйретіп, арнайы дайындықтан өткізді. Сондай-ақ 65 жұмысшы топқа егістік басынан жатын орындар әзірленді. 3 мыңға жуық жайылым иелеріне хабарлама беріліп, олар да анықтау шараларына жұмылдырылды.

Авторлары: Жандос Жұмабек, Ерболат Әбіш