Ақмола облысында 2 тұқымбақ салынып жатыр, деп хабарлайды 24KZ. Оның бірі Атбасарда, екіншісі Зеренді ауданында салынып жатыр. Қос нысанда жылына миллиондаған көшет өсіріледі. Жалпы облыс аумағында 15 тұқымбақ жұмыс істеп тұр. «Оның ішінде Шортанды ауданындағы бақтың ТМД-да баламасы жоқ», – дейді мамандар.

Шортанды ауданындағы бұл тұқымбақ 2023 жылы ашылған. Жалпы аумағы 485 гектар. Қазір мұнда 1 млн.түп ағаш егілген.

Тұқымбақ қызметкерлері әзірге 65 гектар алқапты игеріп отыр. Онда ағаштың 10-ға жуық түрі өсіріледі. Оның дені жергілікті климатқа жақсы бейімделген.

Ерназар Серікбаев, тұқымбақтың бас агрономы:

- Қазір біздің қасымызда тұрған мына терек ағашы ғой. Мұнда «пух» болмайды. Қазір қаланың ішінде бәрі «пух», аллергия деп қиналады. Ал мында «пух» мүлдем болмайды. Негізі бұл ағаш осы жерге сіңіп кеткен. Үйренген. Екі жыл қыстап шықты. Қазір, міне, кісінің бойындай болып тұр.

Мамандар тұқымбақта тамшылатып суару әдісін қолданады. «Бұл топырақтың құнарлығын арттыруға пайдалы», – дейді. Өнімділік бірнеше есеге өсіп, минералды тыңайтқыш қолдану екі есеге азаяды.

Қуат Ерғалиев, тұқымбақтың бас директоры:

- Тал деген бұл жай ғана оттегі емес. Ол жердің құнарлылығына әсер етеді, көбейеді. Құстар келеді. Ол біздің экожүйені жаңартады.

Кәсіпорын елорданың дәл іргесінде орналысқанымен, инфрақұрылымға қатысты проблема көп. «Әсіресе жол, жарық пен газ мәселесі шешілмей тұр», – дейді тұқымбақ қызметкерлері.

Қуат Ерғалиев, тұқымбақтың бас директоры:

- Қазір көрдіңіздер, жол жоқ. Біз жай жолды өзіміз салып алдық. Электр қуаты жоқ. Сорғылар генератормен істеп жатыр. Газ жоқ. Газ болса, біз осы жерде жылыжай салып, қалаға қызанақ, қияр, өсімдіктерді жеткізуші еді.

Болат Төкішев, Шортанды ауданы әкімінің орынбасары:

- Қазіргі уақытта біз Табиғи ресурстар және экономика басқармасымен мемлекеттік-жекеменшік әріптестік құру туралы жұмысты пысықтап жатырмыз. Өңірді көгалдандырумен біздің тұқымбақ айналысса деген ұсынымыз бар. Ал тұқымбақтың инфрақұрылымын кезең-кезеңімен жаңартуды көздеп отырмыз.

Елімізде орманды алқап аз. Небәрі 5%-ке жуықтайды. «Сондықтан жасыл желекті көбейту қажет», – дейді экологтар. Ал бұл міндет орманшылар мен осындай тұқымбақ мамандарының еншісінде. Мемлекет басшысының өзі орманды алқапты көбейтуді тапсырған еді. Президент пәрменіне орай тек биылдың өзінде өңірде 18 млн түп көшет егіледі.

Авторлары: Абзал Балтабаев, Виктор Полянный