Қазақстанда волонтёрлік қозғалыс қарқынды дамып, қоғамдық өмірдің маңызды бөлігіне айналды. 2020 жыл «Волонтер жылы» болып жарияланғаннан кейін, 275 мыңнан астам ерікті әлеуметтік, экологиялық және мәдени жобаларға белсенді атсалысып келеді. Олар қайырымдылықпен шектелмей, ұлттық бірлік пен жауапкершілік мәдениетін нығайтуға үлес қосуда. Волонтёрлік – тек көмек емес, елдің тұрақты дамуына бағытталған құндылық.
Соңғы жылдары Қазақстанда волонтёрлік тек уақытша көмек көрсету форматы емес, жүйелі әрі ұйымдасқан қоғамдық қозғалысқа айналды. Қазіргі таңда елімізде 755 ресми еріктілер ұйымы ұйымы мен 2 мыңға жуық бастамашыл топ жұмыс істейді. Бұл – жүздеген шараны үйлестіріп, мыңдаған адамға нақты көмек көрсетіп отырған құрылымдар.
Демографиялық тұрғыдан алғанда, негізгі белсенді топ – 29–34 жас аралығындағы азаматтар (шамамен 14,1 мың адам). Одан кейін 35–44 жас (12,8 мың) және 16–24 жас аралығы (11,5 мың). Қызығы – волонтёрлердің 57%-ы ауыл тұрғындары, бұл ауылдағы өзара көмектің дәстүрі әлі де сақталғанын білдіреді.
Айта кетерлік бір жайт – елімізде 55 жастан асқан 3,5 мыңнан астам «күміс волонтёрлер» де белсенді қызмет атқарып жүр. Бұл – еріктілік тек жастардың ісі емес екенін көрсетеді.
Бүгінде қоғамда еріктілікке деген көзқарас өзгеріп, жастар оны бос уақытты өткізудің амалы емес, керісінше, өзінің әлеуетін ел игілігіне жұмсаудың бір жолы ретінде қабылдай бастады. Бұл үрдіске үлес қосып келе жатқан ұйымдардың бірі – «Жастар Рухы» жастар қанаты. Ұйым төрағасы Ақерке Искандерованың айтуынша, кез келген 18 бен 35 жас аралығындағы белсенді азамат бұл қозғалысқа қосыла алады.
Қазіргі таңда қоғамда еріктілікке деген көзқарас түбегейлі өзгеріп келеді. Жастар мұны уақыт өткізу емес, өз әлеуетін қоғам игілігіне жұмсау деп қабылдайды. Осы бағытта «Жастар Рухы» Жастар қанатының да қосқан үлесі зор. Бүгінде біздің қатарымызда 105 000-нан астам белсенді жас бар. Сондай-ақ еліміздің барлық өңірінде белсенді жастармен жұмысты үйлестіріп жүрген 20 аймақтық филиалдарымыз бар. Ұйым елдің мемлекеттік жастар саясатын қалыптастырудың бастауында болып, оның дамуына өзіндік ықпалын көрсетіп келеді, — дейді Ақерке Искандерова.
Ұйым еріктілері төтенше жағдай кезінде ғана емес, қоғамның барлық маңызды салаларында белсенділік танытып жүр.
«Жастар Рухы» тек төтенше жағдай кезінде ғана емес, жыл бойы тұрақты түрде көптеген ірі әлеуметтік, экологиялық, патриоттық, мәдени-бұқаралық іс-шаралардың және қайырымдылық пен игі бастамаларды жүзеге асырушы ұйым. Біздің еріктілер қоғамның барлық маңызды саласында тұрақты түрде еңбек етіп келеді. «Жастар Рухы» — білімге ұмтылған, еңбекқор, елі мен жерін сүйетін отанына адал патриот жастардың басын біріктіретін жастар ұйымы, — дейді ұйым басшысы.
Қай жерде қиындық болса, сол жерде – «Жастар рухының» еріктілері. Бұл жай ғана ұран емес, соңғы жылдары елімізде болған бірқатар апаттар кезінде нақты дәлелденген шындық. Су тасқыны, орман өрті, жарылыс, қақаған аяз – қандай жағдай болмасын, волонтёрлер бірінші болып көмекке келіп, елмен бірге болды. Олар қол қусырып отырмай, нақты әрекетке көшті. Олардың ерлігі – үнсіз, бірақ ұмытылмас.
2019 жылы Арыстағы жарылыста «Жастар рухының» 750-ден астам волонтёрі көмекке келіп, 450 тонна гуманитарлық жүк жеткізді. 2020 жылы Мақтааралдағы су тасқыны кезінде 500 ерікті 1000 тоннаға жуық көмекті тұрғындарға үлестірді. 2022 жылы Қостанайдағы орман өрті кезінде 1300 волонтёр жұмылдырылып, 1200 тоннадан астам жүк таратылды. Сол жылы Екібастұзда жылусыз қалған халыққа 1700-ден астам электр жылытқыш жеткізілді. Ал 2023 жылы Абай облысындағы өрт кезінде 500 волонтёр 126,5 тонна көмекті үш ауылдың тұрғындарына үлестірді.
Төтенше жағдай болған сәтте біреу қашады, біреу қарап тұрады, ал біреу алға шығады. Абай Сырлыбаев – сол алға шыққан еріктілердің бірі ғана емес, бірегейі.
2019 жылдың жазы. Арыс қаласында алапат жарылыс. Сол сәтте Абай Шымкентте «Жастар рухы» жастар қанатында жұмыс істеп жүрген еді. Күн тәртібінде ардагерге көмек көрсету жоспары тұрса да, бір сәтте бәрі өзгерді.
Арыс жарылысы туралы хабар жеткен бойда, жоспарды ысырып қойып, бірден әрекетке көштік. Қалалық әкімдікпен бірлесе штаб құрдық. Мектептер мен колледждердің ғимараттарын уақытша баспанаға айналдырдық. «Жастар рухының» еріктілері тұрғындарды эвакуациялап, жатын орындарға орналастырды, – дейді Абай.
Сол кезден бастап ұйқысыз түндер, мыңдаған адамның тағдырына алаң болған күндер басталды. Бірі баласын жоғалтты, бірі туған-туысынан көз жазды. Бірақ Абай бастаған еріктілер босаңсымады.
Бір ата-ана баласының жоғалғанын айтып жылады. Біз бірден барлық пунктті хабардар етіп, базадағы мәліметтер арқылы баланы тауып, отбасымен қайта қауыштырдық. Бұл – біздің ұйымшылдық пен жүйелі жұмысымыздың жемісі еді, – дейді ол.
Абай тек уақытша көмек көрсетіп қана қоймай, ары қарай да ел үшін еңбек етті. 2023 жылы халықаралық деңгейдегі ерікті ретінде танылды. Бірақ атаққа емес, адамдарға көмектесуге асықты. Қазір де ол аз қамтылған отбасыларға, жалғызбасты қарияларға қол ұшын созып келеді.
Еріктілік – науқан емес. Бұл – өмір салты. Қоғамда жақсылық жасауға дайын жандар көп болса, кез келген дағдарыстан аман өтеміз. Мен жастарға айтар едім: батыр болудың қажеті жоқ, бірақ бір адамға болсын шын көңілмен көмектесе білсең, сол – нағыз ерлік, – дейді Абай.
Абайдың тағы бір бағыты – қан донорлығы. Университетте алғаш рет тапсырып көрген қан беру шарасы кейін жыл сайынғы дәстүрге айналды. Бүгінде ол 20 реттен астам донор болып, ондаған адамның өмірін құтқаруға үлес қосқан.
2022 жылдың қарашасында болған Екібастұздағы жылу жүйесінің апаты – бүкіл елді алаңдатқан төтенше жағдай болды. Мыңдаған тұрғын жылусыз қалып, қақаған аязда қиындыққа тап болды. Осы сын сәтте көмекке келгендердің қатарында «Жастар рухы» жастар қанатының Павлодар облыстық филиалының белсендісі, Торайғыров университетінің 3-курс студенті Жанақ Заятов та бар.
Мен Екібастұзда туып-өстім. Отбасым, ата-анам сол жерде тұрады. Оқиғаны алғаш туыстарымнан естіп, кейін ақпарат құралдарынан көрдім. Бірден шешім қабылдап, көмек көрсетуге бел будым, – дейді Жанақ Заятов.
Ол басқа еріктілермен бірге апат орнына аттанып, жылытқыш құралдарды таратуға, гуманитарлық жүк тасуға, электр мамандарына тамақ жеткізуге, осал топтағы азаматтарға көмектесуге қатысты. Екібастұздың қатты аязында, әсіресе, жалғызбасты қарттар мен мүмкіндігі шектеулі азаматтар үшін бұл көмек ерекше маңызға ие болды.
Бір күн біз бір егде жастағы әженің үйіне бардық. Ол кісі жалғыз тұрып жатқан, көрер-көрмес жағдай. Балаларының қарауынсыз қалғандай әсер қалдырды. Қатты аязда жылусыз отырғанын көргенде жүрегіміз сыздап кетті. Қолымыздан келген көмекті көрсетіп, жылытқыш жеткіздік, – дейді ол.
Жанақ бұл жағдайдан маңызды қорытынды шығарды: төтенше жағдайлар – тек инфрақұрылымның әлсіздігін емес, азаматтық сана мен жауапкершіліктің деңгейін де ашып көрсетеді.
Осы оқиға мені одан сайын отансүйгіштікке, жауапкершілікке жетеледі. Мен жастарға айтар едім – қандай жағдай болмасын, туған жеріңе, еліңе көмектесуге әрдайым дайын болу – нағыз патриотизмнің белгісі. Бірлік пен жанашырлық – кез келген қиындықты жеңудің кілті, – дейді ерікті.
Атыраудағы су тасқыны кезінде мыңдаған тұрғын баспанасыз қалып, ауыр жағдайды бастан кешірді. Сол сәтте көмек қолын созғандардың алдыңғы қатарында жастар тұрды. Солардың бірі «Жастар рухы» жастар қанатының белсенді мүшесі Болат Әділет.
Ерікті ретіндегі алғашқы қадамым колледжге түскен кезімнен басталды. Белсенді жастардың қоғамдық шараларға, сенбіліктер мен қайырымдылық акцияларына қатысып жүргенін көріп, мен де қатарларына қосылғым келді. Кейін «Жастар рухы» құрамына кірдім. Содан бері бұл қозғалыс – өмірімнің бір бөлігіне айналды, – дейді Әділет.
Апат кезінде Әділет те көп қатарластары секілді қарап отыра алмады. Жағдайдың күрделілігі мен қауіптілігін сезінген бойда, гуманитарлық көмек штабында жұмыс істеп, зардап шеккен аудандарға қажетті заттарды таратуға кірісті.
Алдымен Атырау облыстық №2 гуманитарлық штабта жұмыс атқардым. Келген көмектерді қабылдап, сұрыптап, нақты аудандарға жөнелтумен айналыстық. Сонымен қатар өз оқу орнымызбен бірге Жайық өзенінің жағасына барып, бөгеттер тұрғызуға қатыстық. Бұл – нағыз бірлік пен ауызбіршілік қажет болған сәттер еді, – дейді ол.
Бірақ ерікті болу тек ниетпен шектелмейді. Әділет ең қиын сәттерді де жасырмай айтып берді:
Кейде көмек сұрап келетін адамдар өте көп болады. Ал жиналған ресурстар бәріне бірдей жетпей жатады. Сол кезде «кімге бірінші апару керек?», «қалай әділ үлестіреміз?» деген сұрақтар туындап, үлкен жауапкершілікпен шешім қабылдау керек болды. Түнге дейін, кейде түн ішінде жұмыс істеген күндер де аз болған жоқ.
Су тасқыны салдарынан үйсіз қалған, көзіне жас алған қарттарды көргенде, еріксіз жан ауырғанын да жасырмайды.
Үйлері жарамсыз болып қалған адамдардың мұңын көріп, жаның түршігеді. Сол сәтте көмектесу – жай міндет емес, азаматтық борыш екенін терең түсінесің.
Жастардың еңбегі еленіп, бірте-бірте халықтың қолдауына ие болған.
Алғашқы кезде кей тұрғындар сенімсіздікпен қарады. Бірақ кейін әйелдер түскі және кешкі ас дайындап беріп, ер азаматтар бөгет соғуға шықты. Біз түнгі мезгілде штабқа келген 4-5 фураны қабылдаған сәтті ұмыта алмаймыз. Сол уақытта 100-ге жуық ерікті жұмыла жұмыс істеп, ерекше атмосфера пайда болды. Бұл – ұжымдық рух пен мейірімнің айқын көрінісі еді.
Әділет бұл тәжірибеден көп сабақ алғанын айтады.
Көмек көрсету үшін көп нәрсе керек емес екен. Ең бастысы – шын жүрекпен көмектесу. Адамдарға жанашырлықпен қарап, қолдан келгенді аямаған сәтте өзің де рухани өсесің. Осы жағдай маған: «ешқашан бейжай болмау керек» деген ойды терең сіңірді.
Қазіргі таңда ол «Жастар рухы» аясында түрлі қоғамдық және қайырымдылық шараларға белсене қатысып жүр. Жастарға да үндеу жасауды ұмытпады:
Бұл оқиғаға бейжай қарамаңыздар. Біздің әр әрекетіміз – біреудің өміріне әсер етуі мүмкін. Шын жүректен көмек көрсетіңіздер. Кейде жылы сөздің өзі – үлкен қолдау. Бұл тек апат кезінде емес, күнделікті өмірде де маңызды.
Copyrigth © http://halyknewskz.com Email: news77.kz@gmail.com
BACK TO TOP
